Thursday, June 16, 2011

Fa'asilasilaga a Suli o Aiga Samoa

Document by Maua Faleauto posted on facebook: Autalavou Mo Taeao on 17/6/2011 :-


Fa'asilasilaga a Suli o Aiga e Fa'asino I o Latou Aia Tatau I Mea Totino Fa'ale Aganu'u



Lau Susuga Mamalu I le Ao O le Malo o Samoa Tui Atua Tupua Tamasese

Lau Afioga Le Palemia o le Malo Samoa Fatialofa Tuilaepa Sa'ilele Malielegaoi

Lau Afioga I le Loia Sili o le Malo Samoa Aumua Ming Leung Wai

PO BOX 27, Apia, SAMOA ; Fax (mai NZ) 00685-22110

email – attorney general@samoa.ws


Afioga e,

O a'u o le Suli o se tasi o Aiga I Samoa.

Na nofoia lau'ele'ele o Samoa e o tatou tua'a ua mavae mo tausaga e faitau afe.

O Tulafono Fa'avae Tusia o le Malo Tuto'atasi o Samoa e fa'avaeina I luga o talitonuga fa'a Kerisiano ma tu ma Aganu'u a Samoa.

O le Fa'avae Tusia lea mo tatou uma.

O lo o saunoaina mai e le Fa'avae o Samoa I le Aso 28 Oketopa 1960, o le a tausia ia malu le fa'amasinoga tonu mo tagata uma I taimi uma; ma o le a tausia fo'i ia malu, o a latou aia tatau fa'avae, atoa ai ma aia tatau uma o tagatanu'u uma.

So'o se tulafono e le mulimuli ma le tausia fa'avae ua fa'ata'atia I le Fa'avae Tusia o le Malo Tuto'atasi o Samoa, o le a le aloa'ia ma e le fa'aaogaina.

O sui uma ua filifilia e fa'atino 'upu fai o le Malo Samoa, e ao ona fa'atino o latou tiute I le agaga o le fa'a Kerisiano ma le malamalama I le Aganu'u ina ia tausi ma malu aia tatau uma o tagata a e maise o a latou aia tatau fa'avae. O nei tiute fa'aupufai a Sui, e ao ona fa'atino I le agaga e aunoa ma se fa'ailoga tagata ina ia tumau ai le fa'amasinoga tonu mo tagata uma.

O le Teritori o Samoa e mafai ona fa'amatalaina fa'apenei :-

O molekule (o le upu fa'a Saeinisi e fa'asino I mea iti e fausia ai le tino ola po o le si'osi'omaga), e amata mai I lagi e o'o I le tuloto o le lalolagi I le va o le fua fa'atikeli 13 ma le 14 I le itu I Saute ma le fua fa'atikeli 171 ma le 173 I le itu I Sisifo o le nofoaga I le fa'afanua e ta'u o Greenwich (Peretania); aofia ai ma motu o Upolu, Savai'i, Manono, ma Apolima I le Vasa Pasefika ma motu lata ane iai.

I lo'u tulaga o le suli o lo matou aiga ua ou mautinoa fa'atasi ma lo'u Aiga e le I iai lava se taimi ua foa'i ai I le Malo o le HRPP o matou aia tatau e fa'asino I a matou mea totino nei e pei o le avanoa I le vanimonimo, o le oga sami e fagogota ai, o ni minerale o I le 'ele'ele, o vai taumafa mai lo matou laufanua, o la'au toto ma isi lava tamao'aiga 'ese'ese.

E aofia ai uma o matou aia tatau ma va fealoaloa'i e amata mai lava I le laititi fa'a-molekule (molecular) e fa'atauaina e le Samoa e amata mai Lagi e o'o I le Ogatotonu o le lalolagi o Samoa ma ona teritori.

O le Fa'avae Tusia o Samoa o lo o ua fa'amamaluina ai ma fa'atulafonoina ai ina ia malu o tamao'aiga ma meatotino uma mo le lelei o tupulaga nei ma tupulaga I le lumana'i.

E le mafai ona 'ave fua e le Malo HRPP ia tamaoaiga ma measina, a e le I tatalaina le feagaiga ma Aiga e pei ona ua iai I le Fa'avae o le Malo Tuto'atasi o Samoa.

O ni tu'utu'uga mo ni su'egatupe fa'apisinisi e le o amana'ia ai le taua o aia tatau fa'avae o aiga I Samoa e ona mea totino, e le o ni fuafuaga tonu pe fa'ale tulafono ona ua le mulimuli I le fa'atonuga o tusia I totonu o le Fa'avae Tusia o Samoa.

Ua tatau nei loa ona fa'amuta le faoa o aia tatau o Aiga e aunoa ma sa latou fa'atagana.

E tatau lava ona iai ni talanoaga ma Suli uma o Aiga I so o se taimi ua iai ni fuafuaga e ono faoa ai o so o se molekule (molecule) a aiga mo ni mafu'aga tau le Malo po o ni mafu'aga su'e tupe fa'apisinisi.

E iai lava ni aia fa'apitoa a aiga I a latou mea totino o I totonu o Itumalo ma Nu'u.

O ia mea totino e pei o 'ele'ele ma fanua, o le oga sami e fagogota ai, o le malama'aga e ala mai I le natura o le aiga na fanau mai ai, laa'u ma manu, o minerale atoa ma mea lelei uma ua maua mai I laufanua ma molekule uma lava. O le tu'ufa'atasiga o ia molekule e maua ai le atunu'u o Samoa.

O aia tatau uma nei tau le Aiga ma le Atunu'u o lo o saunoa mai ai le Fa'avae o le Malo Tuto'atasi o Samoa, ma e ao lava ona tausia ma aloa'ia.

I le Aso 20 o Iuni 2008 na tusia ai se fa'asilasilaga a le ali'i Loia ma se tagatanu'u o le Aganu'u Samoa e suafa ia Maua Faleauto, e fai ma Sui o Aiga uma o Samoa e fa'ailoa atu ai o lo o tumau pea aia tatau uma ua taua I luga a aiga ma ua tatau nei ona amana'ia ma aloa'ia le tausia o ia aia tatau. Ua le taliaina e Maua Faleauto, le faoa o aia tatau o aiga Samoa ua faia e aunoa ma se finagalo sa'ili ma se maliega mai Aiga e o latou ia aia tatau fa'avaeina.

O lea fa'asilasilaga fa'a lautele na tu'uina atu mo le silafia o Aiga Samoa a e le I pasia tulafono sa tatau ona le pasia, e pei o le Tulafono Resitala o Fanua ma Suafa 2008 (LTRA 2008) ma le Tulafono o le Pulega o Vai 2008.

E le tatau ona pasia o ni tulafono e faoa ai aia tatau o tagatanu'u ma Aiga ona e le fa'atagaina I le Fa'avae Tusia o Samoa.

O le taunu'uga o le fa'amasinoga tonu mo tagata soifua uma, e taua le fa'ailoa atu mo le silafia lelei o tagata uma.

O pulega tonu ma le fa'amaoni pei ona fa'asinoina e le Fa'avae Tusia o Samoa, e le fa'atagaina ai auala fa'atosina po o auala e le kerisiano pei o le pelogia o tagata ma aiga.

E le taumate e mafai lava ona iai o se maliega I tagata Samoa e foa'i o latou aia tatau fa'asino I mea totino. E maua fo'i ni maliega I luga o talanoaga ma feiloa'iga e fa'asino I mea totino pei o 'ele'ele ma fanua ma le vai. A e le gata I lea o le fa'aaogaina o le palota lautele I mataupu ua fa'atonuina e le Fa'avae o Samoa.

So o se Malo na te faoa aia tatau o tagata Samoa, ua le o se Malo ua aloa'ia e le Fa'avae o Samoa ma e le tatau ona 'ave iai o le fa'aaloalo fa'atulafono ma le fa'atamali'i e pulea ai Samoa.

O le Fa'avae o Samoa ma Aganu'u Fa'aSamoa e puipuiina aia o tagata Samoa mai togafiti e 'ave'esea ai o latou aia I totonu lava o lo latou atunu'u.

Na tauto le Malo HRPP latou te puipui I aia tatau o tagata Samoa.


Ou te le I tu'uina atu lava o'u fanua po o o'u vai po o o'u aia tatau I mea totino fa'ale Aganu'u I se tagata se to'atasi.
Ou te le I tu'uina atu fo'i I le Malo HRPP o se fa'atagana e fa'aaoga pe fa'atau ai o'u aia tatau.


O LO'U IGOA O--------------------------------------------------------------------------------

O A'U O LE SULI MAI LE AIGA O—---------------------------------------------------------------

O LA'U SAINI-------------------------------------------------------------------------------

O LE ASO LENEI----------------------------------------------------------------------------


SAINIA E LE LOIA SILI A LE MALO------------------------------------------------------------------------

I LE ASO LENEI------------------------------------------------------------------------------



1. Taofi sau kopi mo au fa'amaumauga.
2. Lafo mai se kopi ia – Maua Faleauto PO Box 273 Turangi 3353NZ
3. Lafo se kopi I le Meli Puipuia I le Ofisa o le Loia Sili o le Malo na te sainia lenei fa'asilasilaga.

Monday, June 13, 2011

Tulafono Resitalaina ai Fanua ma Suafa 2008

O Le Fa'amatalaina o ni Fa'ai'uga mai le Iloiloga Tusitusia a Ruiping Ye e fa'atatau I Le Tulafono Mo Le Resitalaina o Fanua Ma Suafa (LTRA) 2008 i Samoa

Saunia e Maua Faleauto

O le aumaia o auala fa'a-Toreni mai fafo e sui ai le pulega o fanua ma 'ele'ele tau le Aganu'u Samoa, o se mea mata'utia ua lamatia ai le saogalemu o Samoa ma ona laufanua ma ana Aganu'u ma e matua le mana'omia.
A faitau le Tulafono (LTRA) 2008, e iloa ai lona le manino, ma o ona fa'a'upuga o lo o iai ni fa'aletonu matuia.
Na pasia le Tulafono (LTRA) i le tausaga 2008 a e na amata lona fa'atinoga ia Mati 2009.

O lea Tulafono, ua tusia ai auala fa'a-Toreni e resitala ai fanua ma 'ele'ele uma tau le Malo, o 'ele'ele umia sa'oloto (fanua na fa'atauina mai)* ma 'ele'ele tau le Aganu'u ua lisi ma laisene.

O le Tulafono (LTRA) 2008, ua mafai ai fo'i ona resitala o fanua ua atofaina e ni fa'ai'uga a le Fa'amasinoga o Fanua ma Suafa (adjudicated fanua).

A fa'atino le fa'a-Toreni e resitala ai 'ele'ele ma suafa i lalo o le Tulafono (LTRA) 2008, e lua lava 'auala e uia :-

Muamua, e fa'afou le Resitala Tuai ma ona fa'amaumauga uma e aofia ai ma 'eleele o lo o fa'amaumauina i lalo o le Tulafono Resitala 1992/ 1993. 59

O 'ele'ele uma ua lesitalaina i totonu o le Tusi Resitala Fou e pei ona tolaulau atu i luga, e totogi lafoga i le Malo.

Lona lua o 'auala e resitala ai 'ele'ele i le fa'a-Toreni, o le fa'aopoopina lea i fa'amaumauga i le Tusi Resitala o ni 'eleele fou ua talia ma aloa'ia mo lea resitala fou.

I le Vaega e 9(1) o le Tulafono (LTRA) 2008, o lo o ta'ua ai – e ao i le Ofisa Resitala ona resitala o fanua po o 'ele'ele “ tau le Malo, fanua umia sa'oloto (fanua na fa'atauina mai),* po o 'ele'ele tau le aganu'u ua mae'a ona lisi pe laiseneina i lalo o le Tulafono Ma Aiaiga mo le fa'aliliu'eseina o fanua tau le Aganu'u 1965 “ e amata mai i le aso e fa'atinoina ai le Tulafono (LTRA) 2008.

I le Vaega e 9(2) o le tulafono (LTRA) 2008, o lo o ta'ua - e mafai fo'i e le Resitala ona resitala o 'ele'ele tau le aganu'u ua atofaina e le Fa'amasinoga o Fanua ma Suafa i ni ana fa'ai'uga i lalo o le Tulafono o Fanua ma Suafa 1981”



A fa'atusatusa ma le Tulafono 1992/1993, ua fa'atonuina e le Tulafono (LTRA) 2008 ina ia resitala 'ele'ele ma fanua tau le Aganu'u ua mae'a na lisi pe laiseneina; e aofia ai ma 'ele'ele ma fanua ua atofaina e ni fa'ai'uga a le Fa'amasinoga o Fanua ma Suafa (adjudicated fanua).

Ua fa'amamafa fo'i e le Malo, o le Tulafono (LTRA) 2008, “ e fa'aauauina ai Tulafono Tuai mo le resitalaina o fanua tau le aganu'u (ua mae'a na lisi pe ua atofaina )” 60

A e peita'i, o lenei Tulafono (LTRA) 2008, ua manino mai ai o le a afaina tele ai 'ele'ele tau le Aganu'u e pei o le a au'ili'ili atu i lalo :-

O LE FA'ALILIUESEINA O 'ELE'ELE TAU LE AGANU'U

I le tausaga e 1889, I luma mai o taimi o taufetuliga I le lalolagi e su'e ma fa'atau fanua I le Seneturi Sefuluiva, na sainia ai e Malo e tolu – Amerika, Peretania ma Siamani le Feagaiga I Perelini (Berlin) e matua fa'asaina ai ona fa'aliliuese o ni fanua tau le Aganu'u I tagata Europa. 92

Na fa'aauauina lea feagaiga e Niusila. 93

I vaitaimi nei e ui ina ua iai atunu'u o le Pasefika ua fa'asaina le fa'aliliu'eseina o fanua tau le aganu'u I lalo o tulafono tusia, ua fa'amautuina lea tulaga I Samoa ona ua fa'atonuina e le Fa'avae Tusia o le Malo Tuto'atasi o Samoa, I le Parakalafa 102. 94

I lalo o le Parakalafa 102 o le Fa'avae Tusia o le Malo Tuto'atasi o Samoa :-

Ua fa'asaina ai le fa'aliliu'eseina, po o se fa'atonuga e fa'amuta ai se nofoia o se fanua tau le Aganu'u

Ua fa'asaina ai le fa'aaogaina o 'ele'ele tau le Aganu'u mo ni mana'oga su'e tupe

Ua fa'asaina ai le fa'aaoga o 'ele'ele ma fanua tau le Aganu'u mo ni mokesi

Ua fa'asaina ai le fa'aogaina o 'ele'ele ma fanua tau le Aganu'u e totogi ai ni aitalafu ina ua maliu o se tasi. 95

Ua matua taua tele lenei fa'atonuga a le Fa'avae Tusia o Samoa e fa'asaina ai le fa'aliliu'eseina o 'ele'ele ma fanua tau le Aganu'u.

E ao ona aloa'ia lenei fa'atonuga 102 I so'o se taumafaiga e sui ai tulaga o le puleaina o 'ele'ele ma fanua e auala mai I ni tulafono e pei o le Tulafono ua aumai ai auala fa'a-Toreni I Samoa.

Ua fa'atagaina e le Fa'avae Tusia o le Malo Tuto'atasi o Samoa ona lisi, laisene o 'ele'ele ma fanua tau le Aganu'u, po o le fa'aaoga mo ni fuafuaga tau le Malo ma ua fa'apea ona faia I lalo o le Tulafono (LRTA) 2008. 96

O lona uiga, ua aofia ai I totonu o lea fa'atagana o 'ele'ele ma fanua tau le Aganu'u ua lisi, laisene pe ua fa'aaoga I fuafuaga fa'ale-Malo I lalo o le Tulafono 1964 ma le Tulafono mo le fa'aliliu'eseina o fanua tau le Aganu'u 1965. A e o 'ele'ele tau le Aganu'u o lo o totoe, ua matua fa'asaina lava ona fa'aliliu'eseina e tusa ai ma le parakalafa 102 o le Fa'avae Tusia Tuto'atasi o Samoa.

Ua manino mai I lenei fa'atonuga I le tulafono 102, e le mafai ona fa'aliliu'ese atu I nisi o sui o se Aiga Potopoto, po o nisi fo'i Aiga Potopoto, 'ele'ele tau le Aganu'u.

E le mafai fo'i ona fesuia'i o 'ele'ele tau le Aganu'u e I latou e ona 'ele'ele ma fanua. 97.

E ui ina fa'apea o le fa'asaina fa'ale tulafono o le fa'aliliueseina o 'ele'ele ma fanua tau le Aganu'u e fa'aititia ai le fa'aaogaina o 'ele'ele tau le Aganu'u e ni auala su'e tupe mai fafo, ua fa'amaonia lava o lo o mafai pea ona fa'atino le fa'aaogaina o 'ele'ele tau le Aganu'u ua lisiina ma laiseneina mo auala su'e tupe mai fafo I atina'e fa'aonapo nei. 98.

O se mea ua lau silafia o le le mafai lea ona soli le tulafono fa'atatau I le fa'aliliu'eseina o 'ele'ele tau le Aganu'u I le Fa'avae Tusia palakalafa 102 se I vagana ua sui ma teuteu lea tulafono.

I so 'o se teuteuga o le Fa'avae Tusia o le Malo Tuto'atasi o Samoa, e mana'omia ai le lua vae tolu o se palota I totonu o le Palemene,

A e o se teuteuga po o se suiga o le Tulafono palakalafa 102, e mana'omia ai le lagolago a le lua vae tolu o se palota fa'alaua'itele I Samoa e tusa ai ma le fa'atonuga I le Fa'avae Tusia o le Malo Tuto'atasi o Samoa, parakalafa 109. 99

I le Fa'avae Tusia Parakalafa 109, o lo o fa'amauina ai tulaga I le suiina o le Parakalafa 102. 100

Ua fa'amamafaina I nei fa'atonuga fa'ale tulafono le taua tele o le pi'itaga tau le Aganu'u o tagata Samoa ma ona 'ele'ele ma fanua ma o le ala lea o le faigata ona sui pe teuteu o le tulafono parakalafa 102.







O LE RESITALAINA O 'ELE'ELE MA FANUA TAU LE AGANU'U UA FA'ATONUINA I NI FA'AI'UGA A LE FA'AMASINOGA O FANUA MA SUAFA

E leai se fa'atonuga I le Tulafono (LTRA) 2008 e resitala ai 'ele'ele ma fanua tau le Aganu'u ua fa'atonuina e ni fa'ai'uga a le Fa'amasinoga o Fanua ma Suafa vagana ai le fa'atonuga e le manino o lo o I le palakalafa 63.
Ua ta'ua I le Parakalafa 63, e mafai ona resitalaina 'ele'ele ma fanua tau le Malo po o 'ele'ele ma fanua ua fa'atonuina e ni fa'ai'uga a le Fa'amasinoga o Fanua ma Suafa, “ ina ua tu'uina se kopi o lea fa'ai'uga I le Resitala na te fa'amaumauina ma aloa'ia ai loa lea fa'amaumauga I le Tusi Resitala”

O lenei parakalafa 63, ua tutusa pau lava ma le fa'aupuga o lo o I le parakalafa 18 o le Tulafono e resitala ai 'ele'ele ma fanua 1992 /1993. 166

O le suiina o le fa'amaumauina o 'ele'ele ma fanua I le auala fa'a-Toreni ua le o manino lea ma ua tula'i mai ai o fesili e tolu:-

Muamua, pe o aofia ai I totonu o suiga fa'a-Toreni 'ele'ele ma fanua ua fa'atonuina e ni fa'ai'uga a le fa'amasinoga o Fanua ma Suafa?

Lua, pe afai e resitala 'ele'ele ma fanua tau le Aganu'u I lalo o le Tulafono (LTRA) 2008, pe fa'amauina I le Tusi Resitala o ni 'ele'ele ia ma fanua tau-le Aganu'u, pe fa'amaumauina I le Tusi Resitala o ni 'ele'ele ia ma fanua ua umia sa'oloto (po o fanua ua fa'atauina mai )*?
Tolu, o ai le igoa e resitalaina ai 'ele'ele ma fanua I lalo o le Tulafono fa'a-Toreni 2008 ?

Ua aumai fo'i e le Tulafono fa'a-Toreni 2008 tulaga e le manino nei :-

E le o manino pe resitala 'ele'ele ma fanua tau le Aganu'u ua fa'atonuina e ni fa'aiuga a le Fa'amasinoga o Fanua ma Suafa - o ni 'ele'ele ma fanua ua umia sa'oloto (ina ia mafai ai loa ona fa'aliliu'eseina) ?

Talu ai e le o manino le tulaga I le igoa po o le suafa e resitala ai 'ele'ele ma fanua I lalo o le Tulafono fa'a-Toreni 2008, o le a faigofie ai ona fa'aaoga lea tulaga le manino e fa'aofi mai ai ni fuafuaga fa'a le Malo. Tusa lava pe le o se auala aloa'ia, e mafai lava ona fa'atauina o 'ele'ele mo le fa'aaogaina fa'ale-Malo (public purpose). O se na te fa'atauina o ia 'ele'ele ma fanua tau le Malo, o le a matua le afaina lava.

O se fa'ata'ita'iga lelei o le le talafeagai o 'auala fa'a-Toreni I e ona 'ele'ele ma fanua ua fa'aliliu'eseina, o le malamalama'aga lea e maua mai I le fa'amasinoga sa faia I Niusila I le va o Boyd (le na tagi) ma Mayor I Ueligitone (le na tete'e) 231
Na fa'aliliu'eseina e le City Corporation o Ueligitone 'ele'ele ma fanua o le na tagi ina ua fa'aaogaina o se tulafono e le aloa'ia (void) ma sa resitalaina I le igoa o le fa'alapotopotoga o le na fa'aliliuina mai iai ia 'ele'ele ma fanua.
Na aloaia ai loa e le Fa'amasinoga o Wellington City Corporation ua 'ave iai le 'ele'ele ua fa'amasinoina I lalo o le Tulafono. 232

O tulaga matuia nei – le fa'aliliu'eseina o 'ele'ele ma fanua tau le Aganu'u, ma le fa'aliliu'eseina o 'ele'ele ma fanua I lalo o le Tulafono 1964, ma le tulafono 2008. Ua tula'i mai I ia tulafono le tulaga e le aloa'ia ai le fa'atonuga I totonu o le Fa'avae Tusia o Samoa ma ua fa'aaogaina lea tulaga e fa'aliliu'eseina 'ele'ele ma fanua tau le Aganu'u e 'avea ma 'ele'ele ma fanua a se to'atasi (private owner)

Lona uiga ua mafai ai loa ona fa'aliliu'eseina o ni 'ele'ele ma fanua tau le Aganu'u se tele ona, e I le Malo le Pule e fa'aliliu'eseina ai 'ele'ele ma ni fanua se tele o I lalo o le Tulafono 1964.

O le fa'aaogaina o 'ele'ele ma fanua e le Malo, e mafai ona aofia ai o ni fuafuaga mo le fa'aleleiina o feso'ota'iga fa'atekonolosi, ni nofoaga fou po o nofoaga e teu pe tanua ai e maliliu ma nisi lava fuafuaga fa'atagaina fa'ale-tulafono mo le Malo Samoa. 233

I le ma lea, e mafai fo'i e le Ao o le Malo, ona fa'amaonia “so'o se fuafuaga a le Malo” o se fuafuaga tatau lea mo tagata uma. 234

E tatau lava ona iai o ni fa'asalalauga tusitusia pe a ua fuafuaina se fa'aliliu'eseina o so o se 'ele'ele ma so o se fanua. Peita'i, na o le 28 o aso e mafai ai e I latou e ona 'ele'ele ma fanua ona sauni se tete'e atu I sea fuafuaga. 235

I tua atu o tulafono tusia, o le tele lava o 'ele'ele ma fanua ua fa'aliliu'eseina, ua faia lava e aunoa ma ni fa'asalalauga ia I latou e ona ia 'ele'ele ma fanua. 236

A e afai fo'i e iai nisi e tete'e I ni fuafuaga mo le fa'aliliu'eseina o 'ele'ele ma fanua, e mafai lava e le Minisita po o le Ao o le Malo, ona talia lea tete'e. 237

O lona uiga e tutusa pau lava le fa'aliliu'eseina o 'ele'ele ma fanua pei ona faia e le Malo Niusila e fa'aliliu'eseina ai 'ele'ele ma fanua tau le Aganu'u a tagata Maori e 'avea ma fanua Umia Sa'oloto I vai taimi o le fa'atoa nofoia o 'ele'ele ma fanua o Maori e tagata mai fafo. Sa fa'aaogaina lava I na vaitaimi, le pule ma le aia fa'a-Tupu e fa'atauina ai 'ele'ele ma fanua o tagata Maori ma fa'atau atu I tagata ta'ito'atasi mai fafo. O le ala lea o lo o iai pea I Niusila o le mafatiaga ma ni fa'asea a tagata Maori I tausaga e selau ua mavae ona ua afaina tele atina'e ma le aga'i I luma o I latou I totonu o lo latou atunu'u o Niusila.

O le popolega fo'i lenei ua lagonaina e tagata Samoa; ona ua manino ua iai o se 'auala o le a le malu ai Samoa ma ana Aganu'u fa'a-Samoa.
---------------------------------------------------------------------------------------------------------------------
* 'Ele'ele Umia Sa'oloto o lo o fai mai le Fa'avae o Samoa “o 'ele'ele fa'atauina mai”


posted on AMT Facebook Page - facebook: Autalavou Mo Taeao