O se Atua e leai se Atali'i - Tusia e Vavae Toma

Ua tatou iai nei i le amataga o le tausaga lona valu o lenei seneturi lona luasefulutasi. Ma e va'ava'ai atu lava i mea o lo'o tutupu mai i lea itu ma lea itu o le lalolagi, e le fa'aitiitia le vevesi ma le le maua o se to'afilemu i le lalolagi. E tele le mau mafua'aga o le leai o se to'afilemu i le lalolagi a e ua ou fia fa'amamafaina le 'ese'esega o le talitonuga fa'a-Kerisiano po o le lotu Kerisiano ma le talitonuga fa'a-Iselama po o le Lotu Iselama e maua lea i se tusitusiga a Vavae Toma (lo'u tama ua mavae atu) sa tusia mo le Sulu Samoa Mati 2001
e fa'apea -


O se mea uiga ese lava le taua tele i Le Atua le Tama o Lona Atali'i e toatasi na fa'alagolago i ai Lona Liu tino mai mo le fa'aolataga o le tagata agasala. Tatou te maua tele fa'amatalaga moni o lea tulaga i le Tusi Paia. A o le itu taua i le liutino mai o le Atua i Lona Atali'i e le taua ma e le taulia, e leai fo'i se upu e tasi e fa'asino i lea tulaga i tusitusiga paia a isi tapuaiga.

E malie le tala i isi ali'i e to'alua na feiloa'i i Initia i aso ua leva. O le tasi o i laua e lotu Kerisiaano, a o le isi e lotu Iselama. Na iloa e le ali'i lotu Iselama o le isi ali'i e lotu Kerisiano, ona tu'u lea e ia iai o lana Tusi Paia Iselama e igoa o le Quran, e faitau ai. Na fiafia le kerisiano e faitau i lea tusi i se taimi umi lava. Ua uma ona faitau ona toe fa'afo'i lea i lana uo Iselama, ma fai atu iai, "E ui lava ina tele fa'amatalaga o iai i lenei tusi e uiga i le atua o "Ala" a e leai lava se fa'amatalaga o iai i lenei tusi e uiga i sona atali'i."

Na te'i le uo lotu Iselama i sina taimi ona tali atu lea e fa'apea, "Ali'i o la matou tapua'iga e leai leai leai lava se mea fa'apena." Na fa'asino atu e ia i le ali'i Kerisiano le tasi itulau o le Quran o lo o tusia ai upu nei, " O 'Ala na te fa'asaina lenei mea o le faia o sona Atali'i".
Na susu'e fo'i e le Kerisiano lana Tusi Paia ma fa'asino atu i le ali'i Iselama le Ioane 3:16, ma faitau atu iai upu nei, " Aua ua fa'apea lava ona alofa mai o le Atua i le lalolagi, ua ia auina mai ai Lona Atali'i e to'atasi."

O lea lava ituaso, ua nonofo fifilemu i laua uma, ua la lagona ua o'o nei i laua i le eseesega autu o le lotu Kerisiano ma le lotu Iselama. Peita'i na mataina le fiafia ma le loto fa'afetai o le kerisiano i le Atua le Tama na liutino mai i Lona Alo pele e To'atasi mo le fa'amagaloina o le lalolagi agasala aua le fa'aleleiga o le tagata agasala ma le Atua paia, na mafai ona faia ma le atoatoa e Lona Alo e to'atasi.

O se Atua e leai sona Atali'i, e fa'alagolago o Ia i ni feso'otaiga po o i faiga fa'amalosi e mafai ai ona maua mai ni tagata mo Ia. O se talitonuga lea e leai se fa'avae mautu. E manuia i e va'ai atu i le isi itu a e mataga tele ma mata'utia i le i'uga.E pei o le va'ai atu i se auala laupapa e manaia le gasolo atu iai i le pito mai, a e o'o atu le malaga i le isi pito ua iloa ai o se auala laupapa e pala. O le ata lea o se tapua'iga e le mafai ona maua atoatoa ai se leleiga moni o le tagata agasala ma le Atua Paia.

O se mea lava e ofo ai le loto ona o tusitusiga paia a isi lotu latou te talitonu i le Atua, a e leai lava ma se upu e tasi e taua ai le Alo o le Atua o Iesu Keriso na Ia aumaia le fa'aolataga mo le lalolagi agasala. Aisea ua fa'apea ai?

E mafua i le fa'atauaina fa'apitoa o le silisili ese o paia ma mamalu ma sa o le Atua, a e le amanaiaina le silisili 'ese o le alofa tunoa ma le alofa mutimutivale ma le alofa moni o le Atua, na ala ai ona liutino mai i Lona Alo.


(Vavae Toma 2001)

The Greatest Hope of the 21st Century - o le Fa'amoemoe Sili o le Seneturi 21

O nai o'u manatu nei sa tusia mo le Sulu Samoa o Mati 2001 i le tauamataga o le Seneturi 21 -

Afai tatou te matamata i se ata o mea na tutupu i le lalolagi i le seneturi ua mavae atu nei, e mafai ona tatou iloa ai se ata o se lalolagi o tagata o nu'u ma atunu'u e a'afia i pule'aga ma polokalama fa'a komunisi, fa'akapitalisi (capitalist), fa'atemokalasi (democracy) po o puleaga ma tausisiga i tu ma aganu'u e aofia ai talitonuga ma tapuaiga i atua ma tupua 'ese'ese.

Tatou te va'aia fo'i se ata o taua tetele o le lalolagi. O se ata o le fa'atafuna'ina ma le tu'ulafoa'ina o nisi o vaega o tagata e faitau afe ma afe. O se ata o le fetaua'i o Malo a e maise lava i Europa. O se ata o le vaevaeina o lau'ele'ele ma fanua totino o tagata e atunu'u malolosi. O se ata o le fete'enaiga o Rusia ma Amerika. O se ata o le tauatina'e o Malo laiti tuto'atasi.

Tatou te va'aia fo'i se ata o le maoa'e o le poto fa'a saenisi ma le poto fau masini televavave (technology). O se ata o le fa'aaogaina o meatau malolosi, e pei o pomu atomika. O se ata o le fa'afaigofieina o feso'ota'iga ma femalagaina o tagata i so o se itu o le lalolagi. O se ata o le maoa'e o le poto fa'afoma'i ma le togafitiina o ma'i 'ese'ese o le tino.

Tatou te va'aia se ata o le fa'aleaogaina o nisi vaega o le lalolagi e lolo, mafui'e, afa, po o galu afi. O se ata o le fa'aumatiaina o le soifua o tagata e faitau afe ma afe e fa'ama'i pipisi. O se ata o le faitau afe ma afe o tagata mafatia i le le lava o mea 'ai ma vai inu. O se ata o le to'atele naua o tagata ua a'afia i gasegase tau le mafaufau. Tatou te va'aia fo'i se ata o le fa'atumulia o falepuipui i pagota ua fa'asalaina i le gaoi, faomea, fa'amisa, fasioti tagata. O se ata fo'i o le fa'ateteleina o le fa'atauina ma le fa'asalalauina o fuala'au fa'asaina e fa'aaogaina e fa'afiafia i mafaufau o tagata.

Tatou te va'aia se ata o le fa'asalalauina o lotu 'ese'ese e aofia ai lotu kerisiano. O se ata o galuega fa'amisionare, ma galuega fa'aevagelia i le lalolagi. O se ata fo'i o le fete'enaiga o lotu ma tapua'iga i lea itu ma lea itu o le lalolagi. O se ata o fete'enai'ga fa'ale va o malo ona o le 'ese'ese o talitonuga fa'aletapua'iga.

E o'o mai i le tiketi (decade) mulimuli o le Seneturi ua fa'atoa mavae atu nei, o se ata ua va'aia i le lalolagi i le faitau a le 'au popoto, o le luasefulu pasene o tagata ua iai le 'oa ma le tamaoaiga tele a eo le valusefulu pasene o lo o maua i le mativa ma le itiiti pea o lo latou tamaoaiga.

I le va'ai a se tasi saenisi kerisiano i tausaga mulimuli o le seneturi, ua fa'ateteleina le galala ma le fia maua e tagata soifua o se fesoasoani fa'ale-agaga. I le faitau a lea saenisi kerisiano, e ui lava i le mau suiga i le lalolagi ona o faiga ma pule'aga fa'ale-tagata, e tumau ma malosi le fia maua e tagata soifua uma, o le alofa. E tumau pea le mana'o o le tagata soifua ina ia alofaina o ia. E tumau pea le fia maua e le tagata soifua o se lalolagi matagofie e fa'avae i le Upu Moni. Ua fa'apea ifo le Saenisi kerisiano - ua tatau i tagata popoto o le lalolagi ona fa'ato'ese i le Atua ona o le fa'aaogaseseina o le poto mai le Atua ua mafua ai ona mafatia o Lana fanau i ea itu ma lea itu o lenei lalolagi. Ua fa'apea ifo fo'i le saenisi kerisiano - o taimi lelei nei o le fa'aolaolaina o le tala'ina o le Talalelei ia Iesu - o taimi lelei nei o le kerisiano ma le 'au fa'atuatua i le Atua moni, e ta'u atu ai le Fe'au o le Feagaiga fou a e maise le Liutino o le Atua e ala i Lona alo pele o Iesu Keriso.

O se fa'amatalaina o le fa'atuatuaga moni fa'a-kerisiano e se tusitala i le seneturi lona lua, sa fa'apea ai - o nei tagata fa'atuatua i lo latou Atua, e leai so latou fefe e fetaia'i ma ni mea fita, e o'o i ni mea e le o iloaina i le lumana'i. E fai mai i latou e iai pea le Atua i mea uma. O le Upu moni ua iloa nei kerisiano, latou te le iloa poo a mea o le a tutupu i le lumana'i a e latou te iloa ma le mautinoa Le e Ona le lumana'i.

O LE FA'AMOEMOE SILI MO LE SENETURI FOU, NA O LE ATUA LEA. O LE E ONA LE MALOSI UMA LAVA. NA FAIA LE LAGI MA LE LALOLAGI MA MEA UMA NA IAI. SA MALIU LONA ALO O IESU KERISO E FA'AOLAINA AI I TATOU.

E fa'apefea ona tatou fa'ailoa atu lenei fa'amoemoe sili mo le seneturi fou?

(Weir - Sulu Samoa March 2001:11,12).

2008 is a year to remember parents parting words

Picture of Parents headstones

They wanted us to stay true to a faith in Jesus Christ as the best way forward.

As we, the family try to live the message in our own specific circumstances there is no doubt that with prayer God's presence is evidenced in many of the specific situations and challenges faced by our family..

I thank God for our parents and their faith in Jesus.

My resolution for the New Year - 2008

My resolution will be - To act out the 'Golden Rule' of Love one Another and to help more and more people to do the same. I believe this is the most practical strategy for attaining peace in our world now.


Meripa