Lauga a Petaia Setu
Published in Samoa Observer 28 March 2012. Rev Petaia Setu chose Ephesians 2:8-9 -
"For by grace you have been saved through faith, and this is not your own doing; it is the gift of God - not the result of works, so that no one may boast."
“Auā o le Alofa Tunoa ua faaolaina ai outou i le faatuatua... e le ona o galuega”
Wednesday, 28 March 2012 09:15
O le galuega lava ia ma si ona taui. ‘A le āfu, e le ‘ai. ‘A le ‘ai, e le ola. E pei o la tatou mau lea faale soifuaga nei. E faalagolago le ola i galuega. E pei ona fai mai ai o le toeaina o Iakopo, a leai ni galuega ua le aogā (Iakopo 2 :17).
Peitai, ua ese le auala ma le faamoemoe o le Atua mo le faaolaina o le tagata. Ua le manatu le Atua i sau galuega, pe faitauina so tatou tautiga.
Na te le fia silasila ma iloilo pe tele pe itiiti ona e galue.
A o ā foi ni mea tatou te lu’ulu’uina atu ina ia alofa mai ai o ia! E leai. E le faapena le Atua. A o le faatuatua, e te talia ai le alofa o le Atua, ma lou talitonu atoatoa, e faaolaina oe e le Atua ia Keriso Iesu.
O la tatou mătua lena: “Auā o le alofa tunoa ua faaolaina ai outou i le faatuatua; e le mai ia te outou foi lea, a o le mea ua foaiina mai e le Atua; e le ona o galuega, ina ne’i mitamita se tasi” E ui lava o loo iai Paulo i le falepuipui, ae le i vaoia ai le alofa o le Atua o loo susulu mai le falepuipui ma malamalama ai le ekalesia i Efeso.
O Efeso, o le totonugalemu lea o tapuaiga i Asia. I le, ua faapea foi ona manatu le aposetolo e tapena ma ia malamalama lelei le ekalesia nei, o i latou o meafaigaluega a Keriso mo le leleiga o tagata uma atoa foi ma le leleiga ma le Atua.
O le leleiga, e fausia i le loto ua maualalo, ua salamō, ua talitonu e iai le alofa faamagalo, e toe fausia ma faafouina ai mafutaga ma isi uso a tagata, aemaise o le mafutaga ma le Atua. I le vaai ai a Paulo, ua le o mafai ona sao le tagata mai le amio leaga ma le agasala mai anamuā.
Ua o se ma’i tuufaasolo ona savavali ai i tuinanau o le tino i aso uma, ua faia pea lava foi e i tatou o mea ua loto iai le tino atoa ma le mafaufau, ua oti ai i tatou (f. 1 – 3).A o le Atua, ua iai le faulai o le alofa. Auā o le alofa lava ia (I Ioane. 4 : 16). Ona o lona alofa tele lava ua ia alofa mai ai ia i tatou (f. 4).
E ui lava ina ua fōua e le tagata lona faamaoni ma tatou ta’ufaatauvaaina lona mamalu ma ona foliga paia na faia a’i i tatou i le amataga (f. 10), peitai, ua na faaola mai ia i tatou faatasi ma Keriso. O lona alofa tunoa lea ua faaolaina ai le tagata.
O le alofa tunoa, o le meaalofa a le Atua i tagata uma. Ua le afaina poo ai oe. Pe e te mativa pe maumea, poto pe valea, maualuga pe le taualoa, matai pe leai, ua foaiina le alofa tunoa ia te oe. Ae, e fia faamanino lava le pito lea Samoa.
O lau tali atu i le alofa tunoa. E maua fua e tagata uma. Ua tatou selesele i le mea tatou te le i lūlūina. O le faigofie ia. E foaiina fua mai e le Atua, ae pau lava le mea a oe ma a’u e fai, o le talia loa.E leai lava se isi mea tatou te faia. E le togia mai ai ni saofaga, pe faaoso ai ni faigā tausala.
E le o le aumai fua e le Atua, ae su’e ai mea a oe ma ou viiga i le ola o le tautua. E le seiloga e fai ni falesa poo ni fale fogāfale fia i lugā. O le faigofie ia o le manao o le Atua, a o le matautia ia o mea tatou te fuafua! E ā Paulo e opogi le ola o Efeso mo le leleiga, ae ā tatou e toso le atunuu ma le ekalesia i ala o maseiga!
E sa’o ai le upu a se tasi tamā (Dr. Griffith Thomas), ‘It is not hard to live in Christian life; it is impossible’ Ioe, e le faigata; e anagatā. Ai e pei o le isi lagona lea e masani ai tatou pe a alu ese se palagi mai le galuega. ‘Sa lelei lava a o loke e kama ia mai fafo, ae papa’i loa foi iai kakou oki loa!’ E le faigata ala o le Atua, ae ua anagatā fuafuaga a tā’ua.
O le faamatalaina e Paulo o le alofa tunoa o le Atua, o le a’a lea o le faaolataga. O le lagona fuatiaifo e lelei o le Atua lava ia, ua na alofa mai ai ia te i tatou, ua ia aumai ai lona Atalii pele e toatasi, ua faafanoina o ia mo i tatou (Kalatia. 3 : 13), ina ia le fano se tasi e faatuatua ia te ia, a ia maua e ia le ola e faavavau (Ioane. 3 :16). O le fesili – Samoa e, e saili i ni ā lou faaolaina? Na sauni le faifeau faiaoga i le isi taeao i lana fono i Apia.
E toalua a’oa’o e faamuli ai. O le isi o loo lagolago le ogaumu, a o le mătua lea ua savali i luma i le faiaoga. “Ua lava le umu ulu ma le miki” o le faiaoga lea. Ae oso atu le uso lea, ‘E ā, e le faia ma se kakou faausi esi?” “Oi, ia, magaia foi!” o le faiaoga lea. Ua alu le faiaoga i Apia ae savali faalii i tua le a’oa’o lea, ato solo mea i tua.
“O le ā alii?” o le isi a’oa’o lea. “Fai aku o lea e fai le umu ulu ae fai mai le ‘iga e fai ma se faausi esi”. Na lūlū le ulu o le isi a’oa’o ma fai atu, ‘A lea ga ou faalogo lelei aku lava o ‘e fai i le kamaloa pe le faia ma se faausi esi?” Na ‘ata ‘e’e le pepelo ma faapea ane, ‘ Ia, fai. Fai pea ia e faakali ai si koeaiga?’
Na fiu Isaraelu e la’u povi pepeti ma manu lelei o le lafu e fai taulaga ai i le Atua, e le i fia tausami ai le Atua.E le fia silasila foi iai le Atua. Fai mai Mika, “ia fai le amiotonu, ia naunau i le alofa, ma ia feoai ma le Atua ma le loto faamaualalo” (Mika. 6 :8).
Fai mai Amosa, “Ia tafe ifo le faamasinoga e pei o vai, ma le amiotonu e pei o le vai e tafe tetele lava”(Amo. 5 :24). Ou te loto i le alofa, ae le o le taulaga; ia iloa foi le Atua e sili lea i lo’u manatu i taulaga mu” (Hos. 6 :6) Samoa e, soia le faamamafa o mea e le mamafa.
E manino lelei le mau a Paulo, e leai lava se galuega e tasi i le lalolagi nei e faaolaina oe. Ao lou loto ia tonu ma ia mamā i le saili mai o le Atua ia te oe. Afai e te talia le alofa tunoa, o lou faatuatua lena. Ua lafoai atoa i le Atua lou faamoemoe ma lou talitonuga.
O lou teena o le alofa tunoa, o lou le talitonu lena. O fua o lou le talitonu, o lou fiafia pea i galuega o le tino (f. 3), o galuega o iai le faafanoga (Kalt. 3 :10). Samoa e, ou te loto ina ia e malamalama ma taofimau i le mea lenei.
O galuega o loo tautala iai Iakopo (Iakopo. 2 :15,16,25), o le galuega faaola. O le mea lena ua tā’ua o galuega lelei. Galuega e mautinoa e ola ai le isi ou uso a tagata. Galuega laveai. Galuega fesoasoani e saoloto ma ola fiafia ai se uso a tagata. E le o galuega soona fai. E fai atu lava e teteva ai agaga ae fai lava.
Ua tatou faaaoga sesē le upu a Iakopo e tauanau ai o tatou manao ma faaaoga sesē ai tofiga ma auaunaga. O le upu a Iakopo, o loo taoto tonu i le auaunaga a Iesu na pogai au lona afio mai i le lalolagi. Faamālōlō ma’i, vavega ma faailoga e faaalia ai le mana ma le alofa laveai o le Atua.
O ala ma faasinomaga o lana feau ma le galuega molimau o le faaolataga. (Mataio. 25 : 34 – 40). Ao galuega o loo asosi iai le lalolagi, na oti ai tatou anamua, ia tatou alo ese ai. “Auā o i latou uma e faalagolago i galuega o le tulafono, ua faafanoina i latou...” (Kalt. 3 :10).
Samoa e, o lou talitonu ma lou faatuatua i le Atua, e te iloa ai ma savali ai i le finagalo faaola o le Atua. E le o galuega, e faaolaina ai oe. E le fiafia le Atua i ni au taulaga. E le mana’o i se faausi esi.
Ae mana’o i lou loto ia sa’o. E sa’o loa lou loto i le Atua, ona sa’o foi lea o mea uma e te fai.Ona ia te oe lea o le lagona fuatiaifo e lelei, e alofa atu ai i le Atua atoa ma tagata.”Auā o le alofa tunoa ua faaolaina ai outou i le faatuatua....e le ona o galuega.”
Amene
Phone: 7737063 / 7783782
"For by grace you have been saved through faith, and this is not your own doing; it is the gift of God - not the result of works, so that no one may boast."
“Auā o le Alofa Tunoa ua faaolaina ai outou i le faatuatua... e le ona o galuega”
Wednesday, 28 March 2012 09:15
O le galuega lava ia ma si ona taui. ‘A le āfu, e le ‘ai. ‘A le ‘ai, e le ola. E pei o la tatou mau lea faale soifuaga nei. E faalagolago le ola i galuega. E pei ona fai mai ai o le toeaina o Iakopo, a leai ni galuega ua le aogā (Iakopo 2 :17).
Peitai, ua ese le auala ma le faamoemoe o le Atua mo le faaolaina o le tagata. Ua le manatu le Atua i sau galuega, pe faitauina so tatou tautiga.
Na te le fia silasila ma iloilo pe tele pe itiiti ona e galue.
A o ā foi ni mea tatou te lu’ulu’uina atu ina ia alofa mai ai o ia! E leai. E le faapena le Atua. A o le faatuatua, e te talia ai le alofa o le Atua, ma lou talitonu atoatoa, e faaolaina oe e le Atua ia Keriso Iesu.
O la tatou mătua lena: “Auā o le alofa tunoa ua faaolaina ai outou i le faatuatua; e le mai ia te outou foi lea, a o le mea ua foaiina mai e le Atua; e le ona o galuega, ina ne’i mitamita se tasi” E ui lava o loo iai Paulo i le falepuipui, ae le i vaoia ai le alofa o le Atua o loo susulu mai le falepuipui ma malamalama ai le ekalesia i Efeso.
O Efeso, o le totonugalemu lea o tapuaiga i Asia. I le, ua faapea foi ona manatu le aposetolo e tapena ma ia malamalama lelei le ekalesia nei, o i latou o meafaigaluega a Keriso mo le leleiga o tagata uma atoa foi ma le leleiga ma le Atua.
O le leleiga, e fausia i le loto ua maualalo, ua salamō, ua talitonu e iai le alofa faamagalo, e toe fausia ma faafouina ai mafutaga ma isi uso a tagata, aemaise o le mafutaga ma le Atua. I le vaai ai a Paulo, ua le o mafai ona sao le tagata mai le amio leaga ma le agasala mai anamuā.
Ua o se ma’i tuufaasolo ona savavali ai i tuinanau o le tino i aso uma, ua faia pea lava foi e i tatou o mea ua loto iai le tino atoa ma le mafaufau, ua oti ai i tatou (f. 1 – 3).A o le Atua, ua iai le faulai o le alofa. Auā o le alofa lava ia (I Ioane. 4 : 16). Ona o lona alofa tele lava ua ia alofa mai ai ia i tatou (f. 4).
E ui lava ina ua fōua e le tagata lona faamaoni ma tatou ta’ufaatauvaaina lona mamalu ma ona foliga paia na faia a’i i tatou i le amataga (f. 10), peitai, ua na faaola mai ia i tatou faatasi ma Keriso. O lona alofa tunoa lea ua faaolaina ai le tagata.
O le alofa tunoa, o le meaalofa a le Atua i tagata uma. Ua le afaina poo ai oe. Pe e te mativa pe maumea, poto pe valea, maualuga pe le taualoa, matai pe leai, ua foaiina le alofa tunoa ia te oe. Ae, e fia faamanino lava le pito lea Samoa.
O lau tali atu i le alofa tunoa. E maua fua e tagata uma. Ua tatou selesele i le mea tatou te le i lūlūina. O le faigofie ia. E foaiina fua mai e le Atua, ae pau lava le mea a oe ma a’u e fai, o le talia loa.E leai lava se isi mea tatou te faia. E le togia mai ai ni saofaga, pe faaoso ai ni faigā tausala.
E le o le aumai fua e le Atua, ae su’e ai mea a oe ma ou viiga i le ola o le tautua. E le seiloga e fai ni falesa poo ni fale fogāfale fia i lugā. O le faigofie ia o le manao o le Atua, a o le matautia ia o mea tatou te fuafua! E ā Paulo e opogi le ola o Efeso mo le leleiga, ae ā tatou e toso le atunuu ma le ekalesia i ala o maseiga!
E sa’o ai le upu a se tasi tamā (Dr. Griffith Thomas), ‘It is not hard to live in Christian life; it is impossible’ Ioe, e le faigata; e anagatā. Ai e pei o le isi lagona lea e masani ai tatou pe a alu ese se palagi mai le galuega. ‘Sa lelei lava a o loke e kama ia mai fafo, ae papa’i loa foi iai kakou oki loa!’ E le faigata ala o le Atua, ae ua anagatā fuafuaga a tā’ua.
O le faamatalaina e Paulo o le alofa tunoa o le Atua, o le a’a lea o le faaolataga. O le lagona fuatiaifo e lelei o le Atua lava ia, ua na alofa mai ai ia te i tatou, ua ia aumai ai lona Atalii pele e toatasi, ua faafanoina o ia mo i tatou (Kalatia. 3 : 13), ina ia le fano se tasi e faatuatua ia te ia, a ia maua e ia le ola e faavavau (Ioane. 3 :16). O le fesili – Samoa e, e saili i ni ā lou faaolaina? Na sauni le faifeau faiaoga i le isi taeao i lana fono i Apia.
E toalua a’oa’o e faamuli ai. O le isi o loo lagolago le ogaumu, a o le mătua lea ua savali i luma i le faiaoga. “Ua lava le umu ulu ma le miki” o le faiaoga lea. Ae oso atu le uso lea, ‘E ā, e le faia ma se kakou faausi esi?” “Oi, ia, magaia foi!” o le faiaoga lea. Ua alu le faiaoga i Apia ae savali faalii i tua le a’oa’o lea, ato solo mea i tua.
“O le ā alii?” o le isi a’oa’o lea. “Fai aku o lea e fai le umu ulu ae fai mai le ‘iga e fai ma se faausi esi”. Na lūlū le ulu o le isi a’oa’o ma fai atu, ‘A lea ga ou faalogo lelei aku lava o ‘e fai i le kamaloa pe le faia ma se faausi esi?” Na ‘ata ‘e’e le pepelo ma faapea ane, ‘ Ia, fai. Fai pea ia e faakali ai si koeaiga?’
Na fiu Isaraelu e la’u povi pepeti ma manu lelei o le lafu e fai taulaga ai i le Atua, e le i fia tausami ai le Atua.E le fia silasila foi iai le Atua. Fai mai Mika, “ia fai le amiotonu, ia naunau i le alofa, ma ia feoai ma le Atua ma le loto faamaualalo” (Mika. 6 :8).
Fai mai Amosa, “Ia tafe ifo le faamasinoga e pei o vai, ma le amiotonu e pei o le vai e tafe tetele lava”(Amo. 5 :24). Ou te loto i le alofa, ae le o le taulaga; ia iloa foi le Atua e sili lea i lo’u manatu i taulaga mu” (Hos. 6 :6) Samoa e, soia le faamamafa o mea e le mamafa.
E manino lelei le mau a Paulo, e leai lava se galuega e tasi i le lalolagi nei e faaolaina oe. Ao lou loto ia tonu ma ia mamā i le saili mai o le Atua ia te oe. Afai e te talia le alofa tunoa, o lou faatuatua lena. Ua lafoai atoa i le Atua lou faamoemoe ma lou talitonuga.
O lou teena o le alofa tunoa, o lou le talitonu lena. O fua o lou le talitonu, o lou fiafia pea i galuega o le tino (f. 3), o galuega o iai le faafanoga (Kalt. 3 :10). Samoa e, ou te loto ina ia e malamalama ma taofimau i le mea lenei.
O galuega o loo tautala iai Iakopo (Iakopo. 2 :15,16,25), o le galuega faaola. O le mea lena ua tā’ua o galuega lelei. Galuega e mautinoa e ola ai le isi ou uso a tagata. Galuega laveai. Galuega fesoasoani e saoloto ma ola fiafia ai se uso a tagata. E le o galuega soona fai. E fai atu lava e teteva ai agaga ae fai lava.
Ua tatou faaaoga sesē le upu a Iakopo e tauanau ai o tatou manao ma faaaoga sesē ai tofiga ma auaunaga. O le upu a Iakopo, o loo taoto tonu i le auaunaga a Iesu na pogai au lona afio mai i le lalolagi. Faamālōlō ma’i, vavega ma faailoga e faaalia ai le mana ma le alofa laveai o le Atua.
O ala ma faasinomaga o lana feau ma le galuega molimau o le faaolataga. (Mataio. 25 : 34 – 40). Ao galuega o loo asosi iai le lalolagi, na oti ai tatou anamua, ia tatou alo ese ai. “Auā o i latou uma e faalagolago i galuega o le tulafono, ua faafanoina i latou...” (Kalt. 3 :10).
Samoa e, o lou talitonu ma lou faatuatua i le Atua, e te iloa ai ma savali ai i le finagalo faaola o le Atua. E le o galuega, e faaolaina ai oe. E le fiafia le Atua i ni au taulaga. E le mana’o i se faausi esi.
Ae mana’o i lou loto ia sa’o. E sa’o loa lou loto i le Atua, ona sa’o foi lea o mea uma e te fai.Ona ia te oe lea o le lagona fuatiaifo e lelei, e alofa atu ai i le Atua atoa ma tagata.”Auā o le alofa tunoa ua faaolaina ai outou i le faatuatua....e le ona o galuega.”
Amene
Phone: 7737063 / 7783782
posted by Meripa Weir at 10:29 AM
0 Comments:
Post a Comment
<< Home