Faiga Palota i Ausetalia ia Setema 2013

I le vaiaso lenei ua fa'ailoa mai ai e le tama'ita'i Palemia o Ausetalia o Julia Gillard,o le a faia faigapalota lautele i le Aso 14 Setema 2013. Ua atoa ai lea o le tolu tausaga talu ona tula'i mai lenei tama'ita'i e fai ma ta'ita'i o Ausetalia ia Iuni 2010. Sa fa'afofoga le mamalu o le atunu'u i se 'oto'otoga o le tulaga o le tamao'aiga o le atunu'u talu ona tula'i mai e ta'ita'i le atunu'u. Na fa'afofoga le atunu'u i lana tolaulauina o fa'afitauli o lo o lagonaina e aiga uma i le atunu'u talu mai ona fa'afuase'ia ona fa'aletonu o le tala i le tupe i le lalolagi na a'afia ai atunu'u uma. E le gata fo'i i lea a e na fofoga le atunu'u i lana molimau i fa'afitauli ua fa'aopoopo mai i aiga talu ai o lea ua asa nei e tagata mafatiaga mafua mai i le vevela o le tau ma ua o'o mai ai o suiga ua fa'ateteleina ai lologa, timuga, leai ni vai pe matu le tau mo ni taimi umi, a e maise fo'i o le fa'ateteleina o afi mumu ua fa'aleaogaina ai mea totino a e maise o le si'osi'omaga. E ui ua le tutusa tupe maua e fa'atino ai galuega tatau ona fai e le Malo, ua folafola mai e fa'amuamua e lana faiga Malo ia maua uma e so o se tamaititi i Ausetalia o avanoa uma ina ia a'oa'oina lelei ai. Ua fa'apea fo'i ona folafolaina mai le taua o le galue o le Malo i ana fuafuaga ina ia maua pea galuega mo tagata o aiga. Manino le fa'ata'atiaga o mea e ao ona fa'atino e le Malo e fesoasoani ai i tagata o le atunu'u. A o le mea silisili ia te a'u i le saunoaga a le tamaita'i Palemia, o lona naunau ina ia maua pea le manuia e aiga uma, ma, o le tiute lea a le Malo o Ausetalia e mautinoa ai le nofo lelei ma le nofo puipuia mai faigata o nei aso. Fa'afetai Julia Gillard i le tofa alofa. Ia alofa le Atua fa'atumuina pea 'oe i le alofa e fa'avae ai lau tautaiina o lenei atunu'u o Ausetalia.