O se Atua e leai se Atali'i - Tusia e Vavae Toma

Ua tatou iai nei i le amataga o le tausaga lona valu o lenei seneturi lona luasefulutasi. Ma e va'ava'ai atu lava i mea o lo'o tutupu mai i lea itu ma lea itu o le lalolagi, e le fa'aitiitia le vevesi ma le le maua o se to'afilemu i le lalolagi. E tele le mau mafua'aga o le leai o se to'afilemu i le lalolagi a e ua ou fia fa'amamafaina le 'ese'esega o le talitonuga fa'a-Kerisiano po o le lotu Kerisiano ma le talitonuga fa'a-Iselama po o le Lotu Iselama e maua lea i se tusitusiga a Vavae Toma (lo'u tama ua mavae atu) sa tusia mo le Sulu Samoa Mati 2001
e fa'apea -


O se mea uiga ese lava le taua tele i Le Atua le Tama o Lona Atali'i e toatasi na fa'alagolago i ai Lona Liu tino mai mo le fa'aolataga o le tagata agasala. Tatou te maua tele fa'amatalaga moni o lea tulaga i le Tusi Paia. A o le itu taua i le liutino mai o le Atua i Lona Atali'i e le taua ma e le taulia, e leai fo'i se upu e tasi e fa'asino i lea tulaga i tusitusiga paia a isi tapuaiga.

E malie le tala i isi ali'i e to'alua na feiloa'i i Initia i aso ua leva. O le tasi o i laua e lotu Kerisiaano, a o le isi e lotu Iselama. Na iloa e le ali'i lotu Iselama o le isi ali'i e lotu Kerisiano, ona tu'u lea e ia iai o lana Tusi Paia Iselama e igoa o le Quran, e faitau ai. Na fiafia le kerisiano e faitau i lea tusi i se taimi umi lava. Ua uma ona faitau ona toe fa'afo'i lea i lana uo Iselama, ma fai atu iai, "E ui lava ina tele fa'amatalaga o iai i lenei tusi e uiga i le atua o "Ala" a e leai lava se fa'amatalaga o iai i lenei tusi e uiga i sona atali'i."

Na te'i le uo lotu Iselama i sina taimi ona tali atu lea e fa'apea, "Ali'i o la matou tapua'iga e leai leai leai lava se mea fa'apena." Na fa'asino atu e ia i le ali'i Kerisiano le tasi itulau o le Quran o lo o tusia ai upu nei, " O 'Ala na te fa'asaina lenei mea o le faia o sona Atali'i".
Na susu'e fo'i e le Kerisiano lana Tusi Paia ma fa'asino atu i le ali'i Iselama le Ioane 3:16, ma faitau atu iai upu nei, " Aua ua fa'apea lava ona alofa mai o le Atua i le lalolagi, ua ia auina mai ai Lona Atali'i e to'atasi."

O lea lava ituaso, ua nonofo fifilemu i laua uma, ua la lagona ua o'o nei i laua i le eseesega autu o le lotu Kerisiano ma le lotu Iselama. Peita'i na mataina le fiafia ma le loto fa'afetai o le kerisiano i le Atua le Tama na liutino mai i Lona Alo pele e To'atasi mo le fa'amagaloina o le lalolagi agasala aua le fa'aleleiga o le tagata agasala ma le Atua paia, na mafai ona faia ma le atoatoa e Lona Alo e to'atasi.

O se Atua e leai sona Atali'i, e fa'alagolago o Ia i ni feso'otaiga po o i faiga fa'amalosi e mafai ai ona maua mai ni tagata mo Ia. O se talitonuga lea e leai se fa'avae mautu. E manuia i e va'ai atu i le isi itu a e mataga tele ma mata'utia i le i'uga.E pei o le va'ai atu i se auala laupapa e manaia le gasolo atu iai i le pito mai, a e o'o atu le malaga i le isi pito ua iloa ai o se auala laupapa e pala. O le ata lea o se tapua'iga e le mafai ona maua atoatoa ai se leleiga moni o le tagata agasala ma le Atua Paia.

O se mea lava e ofo ai le loto ona o tusitusiga paia a isi lotu latou te talitonu i le Atua, a e leai lava ma se upu e tasi e taua ai le Alo o le Atua o Iesu Keriso na Ia aumaia le fa'aolataga mo le lalolagi agasala. Aisea ua fa'apea ai?

E mafua i le fa'atauaina fa'apitoa o le silisili ese o paia ma mamalu ma sa o le Atua, a e le amanaiaina le silisili 'ese o le alofa tunoa ma le alofa mutimutivale ma le alofa moni o le Atua, na ala ai ona liutino mai i Lona Alo.


(Vavae Toma 2001)