Lauga a Vavae Toma i le afio a'e o Iesu i le lagi
Thanks to my brother Talalelei Toma for keeping the audiotape of this lauga that I have transcribed here. From a Vaivasetai EFKS 2AP Lotu ? 1978.
O LE LAUGA saunia e Vavae Toma mo le Lotu i le 2AP a le EFKS Vaivasetai ? 1978.
O le Matua. Galuega 1 f 10 ma le 11
“Ua latou tulimata’i a’e i le lagi a’o afio a’e o Ia. Fa’auta fo’i o tagata e to’alua ua tutu mai ia te i latou i ‘ofu sisina ua fai mai. Outou tagata Kalilaia e, se a le mea tou te tutu ai ma va’ava’ai i le lagi? O Iesu lena ua ‘aveina a’e ia te outou. Ona sisi’i ai lea o ona ‘a’ao ma fa’amanuia ia te i latou. Ona te’a ese lea o Ia mai ia te i latou. Ua si’i tia i le lagi”.
O le autu o le lauga, O LE AFIO A’E O IESU KERISO I LE LAGI.
E tusa ma le tatou faitauga Aso Sa o la tatou tausaga fa’akerisiano, o le Aso Sa o le Afio A’e o Iesu lenei.
Va’aiga Muamua: O LE AFIO A’E O IESU I LE LAGI O LE TAUALUGA.
O le taualuga tatau lelei lea, na taualuga ai e Iesu lana galuega fa’aola mo i tatou i lenei lalolagi. I faiga mea tetele a le atunu’u, e tatau lava ona iai se taualuga; o se taupou, po o se manaia e taualuga ai.
E mata mea malie pe a onomea le taualuga. E o’otia le ‘au maimoa i le sioa ma le pulaloa ma le mana’ona’o. Ua le toe ‘emo se mata. Ua tulimata’i uma le va’ai ma lagona o le tino, ma le mafaufau i gaioiga uma a le taupou onomea. Masani a uma loa le taualuga ua malie, usu loa le pese, o le pese fa’atala’ata e fa’ate’i ai le sioa o le ‘au maimoa:-
Tatou e, tatou e ua pula loa…E!
Ona amene atu fo’i lea o le ‘au maimoa:-
E moni lava, E moni lava…E!
O le tali atu lea a le loto fa’afetai ma le loto malie ina ua malie mata e va’ai. Ua malie le taualuga. Ua malo sausaunoa. O le afio a’e o Iesu i le lagi o le taualuga tatau lelei atoatoa lea, ua malie, ua malie lava.
O le taualuga o le faigamea tele tutasi a le Atua o le fa’atinoga lea o Lona alofa fa’avavau e fa’aolaina letagata agasala. Ua mata’ina i lenei taualuga le moni ma le fa’amaoni o le Upu moni. Ua mae’a lelei atoatoa le galuega fa’aola na Ia afio mai e fai i lenei lalolagi e ola ai tatou.
Ua matamea malie le taualuga, ua fa’amaonia ai atili e moni ma fa’amaoni o Iesu lava na o ia ua taunu’u i ai le fa’amoemoe autu o le Tulafono, o Iesu lava na o ia ua taunu’u i ai fatuga fa’avalo’aga a Salamo, atoa ma valo’aga a perofeta. A e maise lava fo’i o ana a’oa’oga e uiga i mea lilo fa’a le lagi. Ana leai le Afio a’e, po o ua ta’upepeloina ia tusitusiga pa’ia uma.
A na fai e na ona liutino mai Iesu, ma fa’a satauroina, ma maliu, ma toetu, e iai ‘ea se aoga ia te i tatou o lea talalelei? Semanu tatou te maua se talalelei e taualuga i le Toetu..tu..tu..toe oti! O lona uiga e leai se isi e ola i lea talalelei.
A e fa’auta ia i Lona Afio a’e ua fai ma fa’amaoni moni, e moni le Upu moni – o le mea moni le Talalelei o le fa’aolataga o le tagata agasala. Ua malie , ua malie lava, aua o lo tatou olataga lea.
Fai mai Luka – “Ua tulimata’i a’e le ‘au so’o a o afio a’e Iesu i le lagi. Ao isi tagata e to’alua ua tutu mai e ofu sisina, ua fai ane ia i latou – Outou tagata Kalilaia e, se a le mea tou te tutu ai ma va’ava’ai i le lagi..o Iesu lena ua aveina a’e na ia te outou”. Pei ua fai ane, se a le mea tou te saga pulaloa ai? Tatou e, Tatou e ua pulaloa…E! Ua tatau fo’i ona tatou sioa, ma pulaloa, ma fa’a malie, ma fa’a malo ma ifo ma fa’afetai ma Amene atu…E moni lava, E moni lava…Ua malo sausaunoa! Ia ia te ‘oe Iesu le vi’iga e fa’avavau .
Va’aiga lona Lua: O LE AFIO A’E O IESU I LE LAGI O LE FA’ATOSINA.
Ua tosina atu ai tatou, ia fa’alelagi o tatou fa’alogoga. E le se va’aiga fa’anoanoa i le ‘au so’o Iesu i lona afio ese atu e ui ina ua latou le toe va’aia lona tino. Ae ua fai mai Luka, na latou toe fo’i mai i Ierusalema ma le ‘oli’oli tele. Sa i le malumalu i latou e le aunoa. Ua latou vivi’i atu i le Atua. Aisea? A ua ua ta’alili lili pea i totonu o o latou fa’alogona le malie o lona leo a o faia ana a’oa’oga. Ua tata tetele atili o latou agaga i le leo o ana fa’atonuga. Fai mai o Ia: Ua molimau outou i nei mea. Fa’auta fo’i ou te auina mai ia te outou le na folafolaina mai e lo’u Tama. A ia outou nonofo i le ‘a’ai se’ia fa’a’ofuina o outou e le mana mai luga. O le amataga lea o le ola fou i totonu ia te outou.
Ua tupu mai ia te i latou le fia sa’ili i mea o i luga, o iai Keriso o lo’o ti’eti’e i le itu taumatau o le Atua le Tama. Ua ta’ata’a aluga o latou fa’alogoga. Ua uma le ta’a a lalo. Ua uma le fefinaua’i po o ai o latou e sili. Ua uma le fetoa’i so’o. Ua amata ona loloto la latou fa’atofala’ina ma le latou fautuaga. Ua tosina atu o latou agaga i le leo o le fa’atonuga o le latou manuia. A e maua e outou le mana pe a afio ifo le Agaga Pa’ia. O le a fa’aofuina i latou i ‘ofu o le Mana mai luga.
O le Agaga Pa’ia o le ‘ofu o le manumalo; o le ‘ofu o le manuia. O le upu a Luka, Sa i le afeafe aupitoaluga i latou. Ua finafinau i le tatalo ma le ‘ai’oi. O le a le uiga o lea upu “finafinau i le tatalo ma le ‘ai’oi?” Ua fa’alelagi a latou fuafuaga. Ua le toe tosoina i lalo. Ua ta’ata’a ane i luga a latou fuafuaga. Ua fa’ale lagi o latou ola; ua le toe fa’ale lalolagi.
E le ni o le lalolagi outou. O le fa’ala’ei’au lea a Iesu. O’o loa lava i le aso Penetekoso a o iai uma i latou iineii i le afeafe aupito aluga ma le loto gatasi. Ua fa’afuase’i mai loa le ta’alili mai le lagi pei o le matagi ua agi tele mai. Ua tumuai le fale sa latou nonofo. Ua fa’atutumuina ai i latou uma ta’ito’atasi.
O le fa’amatalaga lea o le leo tele o le Agaga Pa’ia i totonu i ai latou. Po o le fa’aofuina i latou e le mana mai luga sa latou fa’atalitali iai. Ua maua e i latou le mana.Ua maua le upu, maua loto lelei, maua agaga matagofie. O le Aso Fanau lea o le ekalesia kerisiano. Ua fanauina i latou i le ola fou e le mana o le Agaga Paia. Pei ua fai ane le Agaga Pa’ia ia i latou i le saga nonofo i le afeafe aupito i luga. “ Ua lava na fono, a e o e fai ni fe’au aoga! Ua lava na fa’atalitali, a e o e tala’i! Ua lava na tatalo a e o e galulue! Ua lava na solo lelei a e o e oti mo le Ali’i! “
Ona ‘ave’eseina lea o i latou nai totonu o le fale ma fa’asalalau solo i auala o le ‘a’ai o Ierusalema e tala’i. Ua fa’atamaoaigaina i latou i mea fa’alelagi. Ua loloto le tofa. Ua fa’alelagi le fa’autaga.
Tasi lea fe’au taua o le afio a’e o Iesu mo i tatou i nei ona po. Soia le tosoina i lalo le tofa ma le uta. Ta’ita’i e o Samoa. Ta’ita’i e o ekalesia. Ia ta’ata’a a luga. Ia fa’ale lagi. Ia loloto le fa’atofalaina ma le fa’autaga i le faiga o tonu mo le manuia o Samoa ma le manuia o ekalesia. Soia le fa’atauina o outou i tupe ma mea’ai ma fagupia ma ‘upu tau fa’asese a le laulaufaiva molemole talapepelo!
Va’aiga e Tolu: O LE AFIO A’E O IESU O LE FA’AMAFANAFANAGA.
E fa’afiafia loto aua ua tatou mautinoa lelei ai ua iai sa tatou uo ua muamua atu i luga e fa’afeiloa’i mai i tatou i le lagi i le maota e fa’avavau.
Fai mai Iesu i ona so’o a o le i afio i le lagi: E tele mea e nonofo ai i le maota o lo’u Tama. O lona uiga o le lagi o se mea tele lava. E foliga mai e faitau miliona ma miliona ni lalolagi ona tau soso atu lea ile lagi. Tele mea e nonofo ai i le maota o lo’u Tama. Ua tatau lelei ai lava ona iai se e fonofono mai ma talialaina mai le taunu’u atu i le lagi fou o le uso finafinau ua fai malaga mamao atu.
O lea o se mea manaia tele lea o le va’ava’ai atu i lea ata o le afio a’e i le lagi. Ua fa’amafanafana mai ai ia te a’u e iai lo’u uso o Iesu na te fa’afeiloa’i mai a’u iina.
I le masina o Ianuari fai mai ai Lale Ieremia ia te a’u, “Vavae, ua tatau nei ona e malaga i Peretania ua fia vave maua se tonu o lenei Tusi pese ua matua leva na fa’atali!” Ona ou fai atu lea ia Lale “Ua lelei a o le mea muamua e te fai ia logo le Ofisa e alu ane se isi e fa’atali a’u aua o Lonetona se ‘a’ai tele. A ou alu atu nei a e leai se isi e fa’atali mai ou te uma ai lava iina i lo’u fefe ma lo’u pala’ai”.
Ona ou alu lea. O le mea aupito sili lea ona ou alu ai ma le o lo’u fefe ma lo’u pala’ai ina ne i leai se isi e fa’atali maia a’u. Taunu’u i Lonetona tolu va’alele ua taunu’u fa’atasi i le taimi e tasi.. Ua fenumia’i ia te a’u po o fea tonu o iai la’u atopa’u. Tete lava lo’u moa i lo’u pala’ai. E ui lava ina malulu a e na vevela atu lo’u tino i lo’u fefe ma lo’u …
Mulimuli ane, o le itu aso lava lea o lo’u fa’aletonu. O le itu aso o le fesea’i, le itu aso o lo’u popole, ua ou te’i ua fa’atalofa mai se isi ia te a’u. “Talofa! O ‘oe lena o Vavae Toma?” Ioe, o a’u lenei. Ma fa’atalofa. Na uaea mai Lale ou te sau e fa’atali ‘oe.O le tamaloa e umi ia te a’u a e ua ou tago lolo’u mai ma ou sogi atu iai i le alafau ma le isi alafau. Ua fusi mai ia te a’u. O le fa’ailoga o la’u fa’afetai tele lava.
Ua uma le tete o lo’u moa. Ua sa’o la’u manava. Ua lagona le malie o le malaga ua taunu’u ma le manuia. Ua talialaina a’u e se uo ia Keriso. Ua fa’amafanafanaina lo’u loto. Ua tatao atu lea fa’afetai i lea fa’afetai.
A e ou te manatu, e sili atu ona suamalie le ‘oli’oli ma sili atu ona loloto le fiafia ma sili atu le susua ole fa’atalofa i le fa’afeiloa’i o tatou e le tatou uo o Iesu i le malae va’alele e fa’avavau, aua o le feiloa’iga lea i le aiga moni tumau. O lea e ‘oli’oli ai le kerisiano e oti..Pe oti fa’apena pe oti fa’apenei.Pe oti iina, pe oti iinei, pe oti i Malua po o Mulifanua. E olioli lava e oti aua ua mautinoa e iai la tatou Uo e fa’afeiloa’ia i tatou.
E matua sa’o atoatoa ia te a’u upu o le Pese a tamaiti “Iesu la’u uo”
Iesu la’u uo. E alofa mai o ia i ao ma po. E tumau Iesu lo’u au. La’u manamea Le Fa’aola fa’avavau.
Oka se fa’amafanafanama a malie. Se fa’amafanafanaga fa’aola totoga. Se fa’amafanafanaga fa’atupu ‘oli’oli.
Fa’afetai ia Iesu. Ua afio ia i luga. O Ia o la tatou uo. E fa’afeiloa’i mai i tatou i le nu’u e leai se po - AMENE.
O LE LAUGA saunia e Vavae Toma mo le Lotu i le 2AP a le EFKS Vaivasetai ? 1978.
O le Matua. Galuega 1 f 10 ma le 11
“Ua latou tulimata’i a’e i le lagi a’o afio a’e o Ia. Fa’auta fo’i o tagata e to’alua ua tutu mai ia te i latou i ‘ofu sisina ua fai mai. Outou tagata Kalilaia e, se a le mea tou te tutu ai ma va’ava’ai i le lagi? O Iesu lena ua ‘aveina a’e ia te outou. Ona sisi’i ai lea o ona ‘a’ao ma fa’amanuia ia te i latou. Ona te’a ese lea o Ia mai ia te i latou. Ua si’i tia i le lagi”.
O le autu o le lauga, O LE AFIO A’E O IESU KERISO I LE LAGI.
E tusa ma le tatou faitauga Aso Sa o la tatou tausaga fa’akerisiano, o le Aso Sa o le Afio A’e o Iesu lenei.
Va’aiga Muamua: O LE AFIO A’E O IESU I LE LAGI O LE TAUALUGA.
O le taualuga tatau lelei lea, na taualuga ai e Iesu lana galuega fa’aola mo i tatou i lenei lalolagi. I faiga mea tetele a le atunu’u, e tatau lava ona iai se taualuga; o se taupou, po o se manaia e taualuga ai.
E mata mea malie pe a onomea le taualuga. E o’otia le ‘au maimoa i le sioa ma le pulaloa ma le mana’ona’o. Ua le toe ‘emo se mata. Ua tulimata’i uma le va’ai ma lagona o le tino, ma le mafaufau i gaioiga uma a le taupou onomea. Masani a uma loa le taualuga ua malie, usu loa le pese, o le pese fa’atala’ata e fa’ate’i ai le sioa o le ‘au maimoa:-
Tatou e, tatou e ua pula loa…E!
Ona amene atu fo’i lea o le ‘au maimoa:-
E moni lava, E moni lava…E!
O le tali atu lea a le loto fa’afetai ma le loto malie ina ua malie mata e va’ai. Ua malie le taualuga. Ua malo sausaunoa. O le afio a’e o Iesu i le lagi o le taualuga tatau lelei atoatoa lea, ua malie, ua malie lava.
O le taualuga o le faigamea tele tutasi a le Atua o le fa’atinoga lea o Lona alofa fa’avavau e fa’aolaina letagata agasala. Ua mata’ina i lenei taualuga le moni ma le fa’amaoni o le Upu moni. Ua mae’a lelei atoatoa le galuega fa’aola na Ia afio mai e fai i lenei lalolagi e ola ai tatou.
Ua matamea malie le taualuga, ua fa’amaonia ai atili e moni ma fa’amaoni o Iesu lava na o ia ua taunu’u i ai le fa’amoemoe autu o le Tulafono, o Iesu lava na o ia ua taunu’u i ai fatuga fa’avalo’aga a Salamo, atoa ma valo’aga a perofeta. A e maise lava fo’i o ana a’oa’oga e uiga i mea lilo fa’a le lagi. Ana leai le Afio a’e, po o ua ta’upepeloina ia tusitusiga pa’ia uma.
A na fai e na ona liutino mai Iesu, ma fa’a satauroina, ma maliu, ma toetu, e iai ‘ea se aoga ia te i tatou o lea talalelei? Semanu tatou te maua se talalelei e taualuga i le Toetu..tu..tu..toe oti! O lona uiga e leai se isi e ola i lea talalelei.
A e fa’auta ia i Lona Afio a’e ua fai ma fa’amaoni moni, e moni le Upu moni – o le mea moni le Talalelei o le fa’aolataga o le tagata agasala. Ua malie , ua malie lava, aua o lo tatou olataga lea.
Fai mai Luka – “Ua tulimata’i a’e le ‘au so’o a o afio a’e Iesu i le lagi. Ao isi tagata e to’alua ua tutu mai e ofu sisina, ua fai ane ia i latou – Outou tagata Kalilaia e, se a le mea tou te tutu ai ma va’ava’ai i le lagi..o Iesu lena ua aveina a’e na ia te outou”. Pei ua fai ane, se a le mea tou te saga pulaloa ai? Tatou e, Tatou e ua pulaloa…E! Ua tatau fo’i ona tatou sioa, ma pulaloa, ma fa’a malie, ma fa’a malo ma ifo ma fa’afetai ma Amene atu…E moni lava, E moni lava…Ua malo sausaunoa! Ia ia te ‘oe Iesu le vi’iga e fa’avavau .
Va’aiga lona Lua: O LE AFIO A’E O IESU I LE LAGI O LE FA’ATOSINA.
Ua tosina atu ai tatou, ia fa’alelagi o tatou fa’alogoga. E le se va’aiga fa’anoanoa i le ‘au so’o Iesu i lona afio ese atu e ui ina ua latou le toe va’aia lona tino. Ae ua fai mai Luka, na latou toe fo’i mai i Ierusalema ma le ‘oli’oli tele. Sa i le malumalu i latou e le aunoa. Ua latou vivi’i atu i le Atua. Aisea? A ua ua ta’alili lili pea i totonu o o latou fa’alogona le malie o lona leo a o faia ana a’oa’oga. Ua tata tetele atili o latou agaga i le leo o ana fa’atonuga. Fai mai o Ia: Ua molimau outou i nei mea. Fa’auta fo’i ou te auina mai ia te outou le na folafolaina mai e lo’u Tama. A ia outou nonofo i le ‘a’ai se’ia fa’a’ofuina o outou e le mana mai luga. O le amataga lea o le ola fou i totonu ia te outou.
Ua tupu mai ia te i latou le fia sa’ili i mea o i luga, o iai Keriso o lo’o ti’eti’e i le itu taumatau o le Atua le Tama. Ua ta’ata’a aluga o latou fa’alogoga. Ua uma le ta’a a lalo. Ua uma le fefinaua’i po o ai o latou e sili. Ua uma le fetoa’i so’o. Ua amata ona loloto la latou fa’atofala’ina ma le latou fautuaga. Ua tosina atu o latou agaga i le leo o le fa’atonuga o le latou manuia. A e maua e outou le mana pe a afio ifo le Agaga Pa’ia. O le a fa’aofuina i latou i ‘ofu o le Mana mai luga.
O le Agaga Pa’ia o le ‘ofu o le manumalo; o le ‘ofu o le manuia. O le upu a Luka, Sa i le afeafe aupitoaluga i latou. Ua finafinau i le tatalo ma le ‘ai’oi. O le a le uiga o lea upu “finafinau i le tatalo ma le ‘ai’oi?” Ua fa’alelagi a latou fuafuaga. Ua le toe tosoina i lalo. Ua ta’ata’a ane i luga a latou fuafuaga. Ua fa’ale lagi o latou ola; ua le toe fa’ale lalolagi.
E le ni o le lalolagi outou. O le fa’ala’ei’au lea a Iesu. O’o loa lava i le aso Penetekoso a o iai uma i latou iineii i le afeafe aupito aluga ma le loto gatasi. Ua fa’afuase’i mai loa le ta’alili mai le lagi pei o le matagi ua agi tele mai. Ua tumuai le fale sa latou nonofo. Ua fa’atutumuina ai i latou uma ta’ito’atasi.
O le fa’amatalaga lea o le leo tele o le Agaga Pa’ia i totonu i ai latou. Po o le fa’aofuina i latou e le mana mai luga sa latou fa’atalitali iai. Ua maua e i latou le mana.Ua maua le upu, maua loto lelei, maua agaga matagofie. O le Aso Fanau lea o le ekalesia kerisiano. Ua fanauina i latou i le ola fou e le mana o le Agaga Paia. Pei ua fai ane le Agaga Pa’ia ia i latou i le saga nonofo i le afeafe aupito i luga. “ Ua lava na fono, a e o e fai ni fe’au aoga! Ua lava na fa’atalitali, a e o e tala’i! Ua lava na tatalo a e o e galulue! Ua lava na solo lelei a e o e oti mo le Ali’i! “
Ona ‘ave’eseina lea o i latou nai totonu o le fale ma fa’asalalau solo i auala o le ‘a’ai o Ierusalema e tala’i. Ua fa’atamaoaigaina i latou i mea fa’alelagi. Ua loloto le tofa. Ua fa’alelagi le fa’autaga.
Tasi lea fe’au taua o le afio a’e o Iesu mo i tatou i nei ona po. Soia le tosoina i lalo le tofa ma le uta. Ta’ita’i e o Samoa. Ta’ita’i e o ekalesia. Ia ta’ata’a a luga. Ia fa’ale lagi. Ia loloto le fa’atofalaina ma le fa’autaga i le faiga o tonu mo le manuia o Samoa ma le manuia o ekalesia. Soia le fa’atauina o outou i tupe ma mea’ai ma fagupia ma ‘upu tau fa’asese a le laulaufaiva molemole talapepelo!
Va’aiga e Tolu: O LE AFIO A’E O IESU O LE FA’AMAFANAFANAGA.
E fa’afiafia loto aua ua tatou mautinoa lelei ai ua iai sa tatou uo ua muamua atu i luga e fa’afeiloa’i mai i tatou i le lagi i le maota e fa’avavau.
Fai mai Iesu i ona so’o a o le i afio i le lagi: E tele mea e nonofo ai i le maota o lo’u Tama. O lona uiga o le lagi o se mea tele lava. E foliga mai e faitau miliona ma miliona ni lalolagi ona tau soso atu lea ile lagi. Tele mea e nonofo ai i le maota o lo’u Tama. Ua tatau lelei ai lava ona iai se e fonofono mai ma talialaina mai le taunu’u atu i le lagi fou o le uso finafinau ua fai malaga mamao atu.
O lea o se mea manaia tele lea o le va’ava’ai atu i lea ata o le afio a’e i le lagi. Ua fa’amafanafana mai ai ia te a’u e iai lo’u uso o Iesu na te fa’afeiloa’i mai a’u iina.
I le masina o Ianuari fai mai ai Lale Ieremia ia te a’u, “Vavae, ua tatau nei ona e malaga i Peretania ua fia vave maua se tonu o lenei Tusi pese ua matua leva na fa’atali!” Ona ou fai atu lea ia Lale “Ua lelei a o le mea muamua e te fai ia logo le Ofisa e alu ane se isi e fa’atali a’u aua o Lonetona se ‘a’ai tele. A ou alu atu nei a e leai se isi e fa’atali mai ou te uma ai lava iina i lo’u fefe ma lo’u pala’ai”.
Ona ou alu lea. O le mea aupito sili lea ona ou alu ai ma le o lo’u fefe ma lo’u pala’ai ina ne i leai se isi e fa’atali maia a’u. Taunu’u i Lonetona tolu va’alele ua taunu’u fa’atasi i le taimi e tasi.. Ua fenumia’i ia te a’u po o fea tonu o iai la’u atopa’u. Tete lava lo’u moa i lo’u pala’ai. E ui lava ina malulu a e na vevela atu lo’u tino i lo’u fefe ma lo’u …
Mulimuli ane, o le itu aso lava lea o lo’u fa’aletonu. O le itu aso o le fesea’i, le itu aso o lo’u popole, ua ou te’i ua fa’atalofa mai se isi ia te a’u. “Talofa! O ‘oe lena o Vavae Toma?” Ioe, o a’u lenei. Ma fa’atalofa. Na uaea mai Lale ou te sau e fa’atali ‘oe.O le tamaloa e umi ia te a’u a e ua ou tago lolo’u mai ma ou sogi atu iai i le alafau ma le isi alafau. Ua fusi mai ia te a’u. O le fa’ailoga o la’u fa’afetai tele lava.
Ua uma le tete o lo’u moa. Ua sa’o la’u manava. Ua lagona le malie o le malaga ua taunu’u ma le manuia. Ua talialaina a’u e se uo ia Keriso. Ua fa’amafanafanaina lo’u loto. Ua tatao atu lea fa’afetai i lea fa’afetai.
A e ou te manatu, e sili atu ona suamalie le ‘oli’oli ma sili atu ona loloto le fiafia ma sili atu le susua ole fa’atalofa i le fa’afeiloa’i o tatou e le tatou uo o Iesu i le malae va’alele e fa’avavau, aua o le feiloa’iga lea i le aiga moni tumau. O lea e ‘oli’oli ai le kerisiano e oti..Pe oti fa’apena pe oti fa’apenei.Pe oti iina, pe oti iinei, pe oti i Malua po o Mulifanua. E olioli lava e oti aua ua mautinoa e iai la tatou Uo e fa’afeiloa’ia i tatou.
E matua sa’o atoatoa ia te a’u upu o le Pese a tamaiti “Iesu la’u uo”
Iesu la’u uo. E alofa mai o ia i ao ma po. E tumau Iesu lo’u au. La’u manamea Le Fa’aola fa’avavau.
Oka se fa’amafanafanama a malie. Se fa’amafanafanaga fa’aola totoga. Se fa’amafanafanaga fa’atupu ‘oli’oli.
Fa’afetai ia Iesu. Ua afio ia i luga. O Ia o la tatou uo. E fa’afeiloa’i mai i tatou i le nu’u e leai se po - AMENE.
posted by Meripa Weir at 5:33 AM
0 Comments:
Post a Comment
<< Home