O a ni auala e fa'atemokarasiina ai faiga palota i Samoa ia Mati 2011?

O le aso nei ua maua ai tala mai Aikupito ua fa'amavae le Peresetene o Mubarak. O se taunu'uga lenei sa i agaga o le afe ma afe o tagata Aikupito sa potopoto i le lua vaiaso e fa'aali lo latou le toe lagolagoina o lea ali'i e avea ma o latou ta'ita'i. O lenei taumafaiga tu'ufa'atasi na amata mai e se vaega talavou i luga o le auala feso'ota'i o le facebook ma le internet. Ua fa'aalia mai ai le fa'aaogaina o auala televavave o nei aso e fe'avea'i ai manatu ma fa'anaunauga fa'apolokiki o tagata i o latou ta'ita'i.

O le vaiaso nei fo'i o lo o iai i Samoa ni sui o le Autalavou Mo Taeao o lo o tufatufa ma fa'asalalau i tagata i Samoa se fe'au tusia i se laupepa ina ia fa'atauaina le avanoa palota e latou uma ua resitala e palota. ina ia palota ma le alofa,ma ia palota mo tupulaga o le a tau'aveina le fu'a o Samoa a taeao.
O le Autalavou Mo Taeao, na amataina i luga o le facebook e ni tagata Samoa to'alaiti na latou lagona fa'atasi le taua o le leo o tupulaga talavou talu ai o tupulaga btalavou ma tupulaga mulimuli mai o latou o le a i le loloto o le a'afia mai fuafuaga ua mae'a ona fai ma fuafuaga o le a faia e se Malo fou ia Mati.
O le taua o le silafia e le mamalu o le 'au palota o le tulaga tonu o iai Samoa, o lo o taumafai ai nei ni sui to'alaiti o le AMT e fa'ao'o atu i 'a'ao o le au palota se laupepa ua tusia mo le silafia e le 'aupalota i Samoa atoa.
O 'auala fa'atemokarasi o le fa'ailoa atu i le 'aupalota o nisi itu taua e le o fa'ailoaina e le Malo ma ta'ita'i o iai nei.

Alofa le Atua ta'ita'i ma puipui i sui o le AMT o lo o faia lenei galuega taua e fesoasoani i le fa'atemokarasiina o palota i Samoa.

E maua nisi fa'amatalaga i le Autalavou Mo Taeao i le blogsite -
www.autalavoumotaeao.blogsite.com