Tapuni le faitoto'a mo le aupalota ia Novema 2010

Ua soloia i lenei aso le Palemene a Samoa mo le sauni atu mo palota ia Mati Aso 4. O se mea lava e fa'anoanoa ai le loto ona ua tapuni vave le faitoto'a a e to'atele e le i lesitala mo palota. Aisea ua fa'atopetope ai? Ua tapuni i se a a e le i lesitala le anoano o e talavou, o tina ma tama'ita'i e tatau ona 'ave iai le avanoa e filifili ai ni sui mo se Palemene fou ina ia mautinoa ai se lumana'i mo latou ma fanau o tutupu a'e? Se palota 'ea na o matai, faipule, ma atunu'u i fafo o iai ni a latou polokalame e tatau ona fa'aauau i Samoa? Se palota 'ea na o e fai pine e pule ai? Po o se palota e ao ona fai i le fa'atemokarasi moni ma le fa'akerisiano moni ina ia maua ai se manuia moni mo Samoa uma a e le na o se vaega?

Talofa e ua manumalo le fili. O aso nei i le lalolagi ua lagolagoina lava e atunu'u tetele mai fafo faiga palota. Manatu fo'i o le tulaga lena i si o tatou atunu'u.

Le Atua e, o lo o e silafia mea uma. Ua e silasila mai i mea o lo'o faia i lalo nei se paga lea ua agasala pea i matou. Fa'aloaloa mai ou 'a'ao alofa e fusi atu lou atunu'u o Samoa ua lavea i togafili a le fili. Fa'amagalo mai ou tagata. Ma ia fa'atupu le filemu i totonu o si o matou atunu'u o Samoa. I lou suafa Iesu ua tatalo atu ai. Amene.