Ua 'ata leotele Satani i Ekalesia Samoa

Tusitusiga ua fa'asalalau Samoa Observer online 7/05/10

Ua ‘ata leotele Satani i Ekalesia Samoa

Tusia: Meripa Olive Weir


O le ulutala o lenei tusitusiga ua mafua ona ua maitau atu o lo o fa’atali pea le Fono Aoao a Ekalesia (e le o aofia ai le to’atele o isi ekalesia) i se finagalo o le Afioga i le Palemia ma lana Kapeneta.

O se fa’ai’uga lea ina ua mae’a se feiloa’iga a sui o le Fono Aoao a Ekalesia ma le Afioga i le Palemia, sa tu’uina atu ai mafua’aga e le talia ai e le Fono Aoao o Ekalesia le pili fa’ale-tulafono a le Malo HRPP o lo o taufa’aofi ina ia mafai ai ona fa’atu ma fa’atino se fale ta’alo tupe e ta’u o le Kasino i Samoa.

Ua ou fa’alatalata atu ai ma le agaga maulalo fa’ale-tina i Ekalesia uma lava i Samoa o lo o ta’ita’iina e le talitonuga “ E tasi lava le Atua o ekalesia kerisiano”, ma tu’uina atu lo’u talitonuga – Ua matua ‘ata ‘e’e Satani i nei tonu ua fai, a e fa’anoanoa le Atua
ma lulu lona Ao i ana ekalesia.

Silasila fo’i, ua 180 tausaga talu ona taunu’u le Talalelei i Samoa. Talu mai lava le tausaga 1830, na maua ai e Samoa le sa’olotoga e tapua’i i lo latou Atua Fou. Talu ai ona mautinoa e Samoa le lelei o lo latou Atua Fou, i le foa’i mai o se to’afilemu ma le fa’amutaina o taua pei ona sa iai i le tele o tausaga i tua atu o le 1830, e le i matamuli Samoa a e sa ‘augofie e fai le tala’iga o le Talalelei i atunu’u ‘ese’ese o le Pasefika.

Sa to’atele sui o Samoa na fa’atama’ia lo latou soifua ona o le tala’iina o le Talalelei a e maise lava i motu e iai Papua Niu Kini, Niu Epeliti (Atu Solomona i aso nei) o nu’u Apoliti ma isi, ua o’o mai ai lava i aso nei o lo o ‘augofie pea sui o Samoa e toe tala’i atu le Talalelei i atunu’u uma o le lalolagi.

I le ma lea, o le Taeao Fou o le taunu’u mai o le Talaelei i Samoa, o se meaalofa lea a le Tupu o Samoa i na vaitau ma ou te talitonu sa ta’ita’ia lea Tupu e le agaga o le Ali’i. O le Tupu o Samoa na taliaina le Talalelei a Iesu Keriso, o Malietoa Vainu’upo Tavita. Tatou te iloa lona talitonu atoatoa i le Atua Fou o Samoa, o le Ala tonu lea o le manuia o lona atunu’u pele. Fa’afofoga fo’i i lana Mavaega i le 1841 -

“ Tumua, o outou papa na outou fa’ae’e ia te a’u, o le a ou alu ma a’u i le tu’ugamau, aua nei toe fa’aaogaina, a ia tasi le tupu o Samoa tau lava o le Atua e to’atasi, o le satauro fo’i o Keriso Iesu ia outou tapua’i i ai se ia o’o i lona toe afio mai. A e o ina tala’i le Talalelei ia Keriso Iesu i nu’u ‘ese, o lo outou manuia lena e tumau ai pea lo outou mamalu e o’o lava i le fa’avavau.” (Gatoloai Peseta Sio, Ti’akono Toea’ina Fa’asalele’aga. Lomia i le O le Sulu Samoa, Iuni 1957 itulau 120).

O lona uiga, ua 168 tausaga (talu le malelega a Malietoa Vainu’upo Tavita) talu ona sa’oloto ma tuto’atasi Samoa i ana tapua’iga fa’ale-Talalelei a e lea fa’atoa savali le 48 tausaga talu ona sa’oloto ma tuto’atasi Samoa mai pulega fa’ale-Malo fa’akolone.

Lenei la ua tatou taunu’u mai i le tausaga 2010, o le a fa’amanatuina ai le 48 tausaga o le Malo Tuto’atasi o Samoa ua fa’avaeina i le Atua, ma le fa’a-Samoa ma tulafono fa’a-Temokarasi o lo o ua tusitusia i le Fa’avae o le Malo Tuto’atasi o Samoa.
A e se paga lea, ua ‘ata leotele Satani i ana Ekalesia. Aisea?

O lo’u manatu fa’atina kerisiano, ua ‘ata ‘e’e Satani ona e ui o lo o ua manino i le tala fa’asolopito o Samoa ma le Fa’avae o Samoa e iai le tiute ma le aia tatau a ekalesia Samoa e fautua ai le Malo ma le Palemene pe a ua tau fa’aofi mai ni pili fa’ale-tulafono e lamatia ai le tala’iina o le Talalelei, a e o lo o ua tu’umamaina e ekalesia ana tiute e su’esu’e lelei le loloto o le mataupu ina ia fa’avae ai sana tete’e.

Aisea e tau fa’atali ai i le Malo ma le Kapeneta a e le fai se Komisi Su’esu’e a Ekalesia po o ni su’esu’ega fo’i a ekalesia e le o iai i totonu o le Fono Aoao? A fai ni su’esu’ega loloto a ekalesia, o le a manino mai ai nisi mafua’aga e le o fa’ailoa mai e le Malo ua mana’omia ai se Kasino i Samoa.

Afai e su’esu’e loloto ekalesia i lenei mata’upu, o le a fa’ailoa mai ai o Samoa se atunu’u e faigofie tele ona fa’aaoga e ni kamupani tetele i atunu’u i fafo po o nisi e pele tupe, e teu ai ma fa’amamaina ai ni a latou tupe ‘ele’elea e tau i miliona ma piliona ni tala. O se isi fo’i fa’aupuga (se’i tulou) o Samoa e iai masini tamea fa’amama tupe ‘ele’elea. Afai o se pele tupe e fa’aalu ni tupe ‘ele’elea(tau miliona ma piliona) i le Kasino, e mafai e Samoa ona fa’amamaina uma nei tupe ‘ele’elea. Pe le o le fa’a-Satani ‘ea lea?

O lona uiga e le o fa’ailoa mai uma e le Malo isi itu o lo o fia pasia ai se tulafono e fa’ataga ai se Kasino ma nisi ‘auala su’e tupe a tagata i fafo. E le o le fa’a-Satani fo’i lea?

O lona uiga fo’i o le a fa’aaoga si o tatou atunu’u e ‘alo ai ni kamupani tetele po o le ‘au pele tupe mai fafo ina ia ‘aua na totogi ni lafoga i totonu o latou atunu’u. Ou te manatu e lagolago mai ekalesia uma i Samoa, ma fa’apea mai “o le fa’a-Satani fo’i lea.”

Afai la e fa’ailoa mai ni fa’a-Satani i ni su’esu’ega loloto a ekalesia i Samoa, e tatau loa ona fa’aaoga le aia tatau a ekalesia o lo o manino i totonu o le Fa’avae i le vaega 63(1), e fa’atino ai se tete’e a ekalesia Samoa i le pili taufa’aofi mo se Kasino. Fai mai le Fa’avae o Samoa e mafai ona fai se savaliga tete’e ma se mau tete’e tusitusia i le Susuga i le Ao Mamalu o le Malo ina ia fa’atino ai fo’i ona tiute ua tusia mo tagata lautele o Samoa. O se isi o ia tiute, o le soloia lea o le Palemene ma ona ta’ita’i ma toe sauni le atunu’u mo palota lautele i le isi tolu masina.


O se su’esu’ega loloto a Ekalesia i le mata’upu o le Kasino ma isi ona itu uma o le a fa’ato’ilaloina ai Satani ma lana ‘ata leotele mai i Ekalesia a Samoa.