Ia Agaga E Tasi Pati Laiti

IA AGAGA E TASI PATI LAITI

Lau Susuga i le Fa’atonu,

Ou te fia fa’aui atu i lau Susuga se manatu - ma’imau pe ana mafai loa ona agaga e tasi Pati Laiti (Pati Mo Tagata, Pati mo Samoa, Pati Tautua ma nisi Pati o lo o tau fa’atu) e sauniuni Samoa ina ia palota mo se Malo Fou ia Mati 2011.

Ua o’o mai taimi mo le galulue fa’atasi ma silasila toto’a i fesili nei: E fa’ape’i le olaga i Samoa i le isi 50 tausaga o i luma pe a fa’alagolago tele lona atina’e i perofeta tufa tupe o le lalolagi? Aisea ea ua fa’ateteleina ai le mativa i atunu’u e tele o le lalolagi e fa’alagolago o latou atina’e i fesoasoani mai fafo? E mafai e pulega fa’ale-aganu’u i nu’u ma alalafaga ona sui ni polokalame atina’e fa’a-pa’aga a le Malo Samoa ma atunu’u i fafo po o kamupani mai fafo? Aisea ua fa’aletonu ai le tulaga tau tupe o le lalolagi i le seneturi o le poto ma le atamai fa’alea’oa’oga sa tatau ona mafai ona puipuia ia tulaga fa’aletonu? Afai e tupu mai le oge i suavai taumafa ma mea tausami i le lalolagi i le 50 tausaga o lumana’i, o a ni sauniuniga a nu’u ma alalafaga ua tatau nei ona galulue ai?

Ou te manatu o ni tali o nei fesili pe a su’esu’e i ai sui mai Pati Laiti, e fesoasoani lea i le fa’atupuina o se agaga e tasi i Pati Laiti e ta’ita’ina ai ni sauniuniga mo le Palota i le 2011.

Ua savali i le 48 tausaga talu ona tuto’atasi Samoa mai pulega fa’a-kolone. O la’u fesili mo Pati Laiti – Aisea ua fa’ateteleina ai le soifua fa’alagolago o si o tatou atunu’u i le tomai ma fautuaga ma perofeta tufa tupe o le lalolagi?


Ia manuia sauniuniga mo faiga palota mo le 2011.

Ma lo’u fa’aaloalo lava,

Meripa Weir (Fiafia e tautua mai Vasa mo Samoa)
meripaweir@gmail.com

Letter to Samoa Observer published 15/02/2010