Palota Mo se Itu Tete'e

Letter published Samoa observer 29/01/10


PALOTA MO SE ITU TETE’E

Lau Susuga a le Fa’atonu,

O la’u tali lenei i le tusitusiga a Mataa’fa Keni Lesa tusia i le gagana Peretania (23-01-10) ma e fa’aulutalaina ‘Defying the political grain or stupidity’. Ou te fa’a-Samoaina ‘O le totoina ‘ea o se fatu fou fa’aupufai mo Samoa, po o se tonu ua faia ma le leai o se fa’autaga loloto?’(le taliaina e Lealapule ma Palusalue o le a fa’avanoa loa o la nofoa i le Palemene ona o le tulafono fou e le mafai ona sui i se isi pati se i vagana ona ua toe fai se palota I o la itumalo).

Ou te fa’amalo atu i ali’i Faipule e to’alua o Lealailepule ma Palusalue. Fa’afetai le lotonu’u. Fa’afetai le loto alofa.

O le maliega maumaututu ua faia e nei ali’i faipule e to’alua, ose tulaga ‘auro fa’a-Iesu. Silasila fo’i, o le o ‘ese o nisi o ali’i faipule mai le itu a le Palemia pei ona sa tupu i le amataga o le 2009 o se avanoa auro lea mo le fa’atuina o se Itu Tete’e i totonu o le Palemene. O se avanoa mo’omia tele lea e Samoa ma ona tulaga fa’aupufai fa’ale-Malo ina ia puipuia ai le pulega o tagata mai pulega ou te fa’atusaina o pulega fa’a-Hitila po o pulega fa’ale-Malo e fa’agaloina ai le mamalu o le atunu’u ona o ni fa’atosina fa’ale-tagata.

A e peitai, o lenei avanoa fa’a-auro ua le faigofie ona maua talu ai le tulafono ua tula’i mai nei e ‘ave’ese ai le nofoa o so o se sui o le Palemene ua mana’o e fai ma sui o se isi pati i totonu o le Palemene. O lona uiga o le tulafono fou ua pei o se pulu fana ua na fanaina ai le avanoa auro mo le paleni o felafolafoa’iga ma faiga-tulafono i totonu o le Palemene.O le fa’atinoina o le tulafono fou o le ala lea o le a toe faia ai ni palota i itumalo ua to’esea o latou sui mai totonu o le palemene e pei o itumalo palota o Lealailepule ma le itumalo palota o Palusalue.

O le maliega ua faia e afiogaiI ali’i faipule e to’alua, o se la valaa’u fo’i leaiI le mamalu o le atunu’u ina ia mataalaiI faiga fa’aupufai a se itu e tasi nate pulea le atunu’u o Samoa. Ua pei o se la vala’au ma taulogologo atu ina ia nofouta i pulega fa’aitu tasi i totonu o Samoa. O le iai o se itu tete’e i totonu o le Palemene , o le iai fo’i lea o se leo o le mamalu o le lautele o Samoa nate tu’ufesili le Malo i ana tonu mo le silafia e le mamalu. O se fa’ata’ita’iga o sea leo o le tu’ufesili a le sui o Gagaemauga Numera 2 le Ali’I Faipule o Levaopolo Talatonu pei ona i le tusitusiga a Marieta Ilalio (Sundaysamoan 24-01-2010) e fa’aulutala ‘Relief funds will be misused:MP) po o i le fa’aSamoa – ‘O le a le moni le fa’aaogaina o fesoasoani tupe na tau’a’aoina mo le sunami’ Na ta’uina mai e Ilalio, sa tu’ufesili Levaopolo ona o se lipoti tusitusia na ia maitau ai e ‘ese fesoasoani na tolaulauina i e fia maua le fesoasoani ‘ese le fesoasoani ua fa’apepaina e le Malo.

I le taimi nei ma le tulaga ua iai si o tatou atunu’u o Samoa i le lalolagi, ua lamatia le soifua o Samoa e matagi malolosi mai fafo. O matagi malolosi o le fa’aletonu o le tulaga tau tupe i le lalolagi(global financial crisis); o matagi malolosi ona o le leai o se maliega i malo o le lalolagi ina ia fa’aititia le vevela i le si’osi’omaga ua a’afia uma ai le soifua lelei o tagata (climate change); o matagi leaga o le su’e tupe o tagata ua fai ai ma pisinisi le fe’avea’i fa’anana o tagata e to’atele (people smuggling); o matagi leaga o le fe’avea’i fa’anana o fuala’au fa’saina mai lea atunu’u i lea atunu’u(illegal drug smuggling); ma isi mau matagi o lo o fa’ailoaina mai e le pepa lenei o le Samoa Observer i masina pe ono ua tuana’i. E tatau ai ona mamao le tofa ma loloto le fa’autaga i e latou te ta’ita’i Samoa I le lumana’i ina ia muamua le fa’amalosiina ma le mautu ole fa’avae o le puleaina o Samoa. Ua onomea ai ma o se mea tatau le tatou fa’amautuina muamua o le Palemene o Samoa.

O la’u tatalo ina ia loloto le fa’autaga i le mamalu o le au palota ina ia amana’ia i lau filifiliga ni sui e agava’a i le fa’a-Iesu i totonu o le Palemene o Samoa.

Ia manuia lava Samoa


Ma lo’u fa’aaloalo lava,


Meripa Weir ( Fiafia e tautua mai vasa mo Samoa)