Kamupani o le a pulea Vai o Samoa

A U T A L A V O U M O T A E A O

Aisea ua talia ai e le Malo Samoa le Kamupani KBR e fa'atulaga ma paipaina o tatou vai taumafa ma vai lafoa'i a e o lo o lipotiina e tagata ua puapuagatia ma mafatia ni faiga le alofa a lenei kamupani mau'oloa i le lalolagi?

O se tagi tautalatala lenei ma loimata maligi i le mamalu o Samoa Atoa mai alo ma fanau a Samoa :-
Ua lipotia lenei kamupani i tusitusiga i nusipepa i atunu'u i fafo, fa'atasi ai ma ni talanoaga ma i latou ua a'afia lo latou soifua, i luga o le ala leo ua ta'ua o le U-Tube i luga o le Internet.

O nei lipoti ua fa'alia mai ai ni mafatiaga e pei - o le isu tafe toto (se i tulou), o kanesa o mama, o fa'aletonu e tutupu mai pa'u o le tino, po o fa'aletonu va'aia i pepe fananau, ma'i taifoi, malaria ma isi – ua mafua mai ina ua o latou inu ma fa'aaoga o vai ua filogia ma ni vaila'au 'o'ona ua ala mai i galuega a lenei kamupani lea ua talia nei e le Malo e galueina lo tatou vai i Samoa nei.

E ui ina o iai nei lipoti fa'asino i le kamupani KBR, a e sa tu'uina pea iai e le Faletupe o Atina'e mai Asia (ADB) le konokalate latou te galulue i le paipaina o vai Samoa. Lona uiga e totogi e tagata Samoa ni tupe nono mai i lea faletupe e fa'atino ai le galuega a lenei kamupani i totonu o Samoa nei.

O le a au'ili'iliina i se Pepa a le Autalavou Mo Taeao (AMT) i se taimi lata mai se tala i lenei mata'upu ma le Kamupani KBR mo le silafia o Samoa Atoa.

Mo le taimi nei ma I le agaga ua tatau ona silafia lenei mata'upu I totonu o Samoa, e talosagaina ai aiga ma nu'u ma so'o se alalafaga ina ia alo I o outou faiva o le felogona'i ma Sui Faipule o itumalo ma alalafaga ina ia talanoaina lenei mata'upu I totonu o le Palemene o Samoa.

Matou te talitonu o so matou fa'ailoa atu, e mafai ai ona o tatou galulue fa'atasi e puipui le soifua o Samoa Atoa.

Ia fa'atasi mai le agaga o le Atua alofa e ta'ita'i ai lenei mata'upu ua feagai ma Samoa Atoa.










facebook: Autalavou Mo Taeao # AMT Leaflet 5 www.autalavoumotaeao.blogspot.com