E Tatau Lava na iai se Itu Agai i le Palemene

E Tatau lava na iai se Itu Agai i le Palemene.


Tusia: Meripa Olive Weir


E tu’itu’i atu pea lo’u nei sui Samoa ona ua toe o se ana ona soloia lea o le Palemene a e sauni Samoa mo ana Palota Lautele ia Mati 2011. O ni mo’omo’oga e molimoli atu i e o le a palota ma filifili ni Sui mo le Palemene i le tausaga fou…alolofa ma IA TAUTUANA SE TATOU ITU AGAI. Po o le Tautua po o le Samoa Party po o le PASS o le mea taua o le sili atu i le 10 le fuainumera o ni sui Faipule e fia maua e maua ai se tatou Itu Agai.

Samoa e, ai lava fo’i se lelei a e i’u ane le Palota i le 2011, ua sefulu le Tautua, sefulu le Samoa Party, sefulu le PASS, Sefulu-lima HRPP, lua sui tuto’atasi (Independents), ma le lua masani mai sui Tuto’atasi (Individual voters). E matua tulaga temokarasi lava si o tatou atunu’u a e emo ane le tatou ata i ni fa’ai’uga fa’apea.

O lona uiga e matua’i galulue malosi uma itu e su’e se fuainumera e maua i se tu’ufa’atasiga (coalition) e ‘avea ma Malo ma maua ai mase itu Agai mo le 2011 i le 2016. A fa’apea se tulaga e o’o iai faiga palota i Samoa, e matua’i o’u vivi’i i le Atua i lana Pule fa’amalumalu ma lana Pule fa’asoa, ua le faia ni o tatou loto a o lona finagalo.

Samoa, o se itu’aiga fa’ai’uga fa’apea e mafai ai fo’i ona tatou fa’apea ane “ua matua kerisiano ma temokarasi faiga palota i Samoa” O i lava fo’i, e le pine a e maua le ta’ita’iga mo le atunu’u i ni auala e fa’amamaina ai ana aitalafu ma toe fa’aolaola ai atina’e o ona laufanua (i itu ‘ese’ese uma lava) e ona lava tagata.

E! pe o ‘ita ea o fai sa ta miti. E! a o ‘ita ‘ea ua mafatia. E! ta te musu i o’o mai i Samoa pulega fa’a’ole’ole mai fafo ua a’afia ai atunu’u i lea itu ma lea itu o le lalolagi. Tatou te maua ni a’oa’oga mai nai tagata o si motu o Boukenivili, po o le atunu’u Aferika o Tanasania, ia po o le atunu’u i Amerika i Saute o Bolivia. O luga o le mafatia ma le alofa i le lumana’i na tula’i ai ma le le fefe, a e fa’alagolago i le malosi mai le Atua mo suiga mana’omia i ia fo’i atunu’u.

Samoa, fa’afetai e le i o’o mai i Samoa faiga palota e fa’aaogaina ai masini komuputa. Ua molimau atunu’u e pei o Initia lata mai nei, e mafai lava e latou e iai le malamalama fa’apitoa ona fa’aseseina ni fa’ai’uga o faiga palota. Aue le fa’aSatani ina malosi!

Ia, Samoa, ua o’o mai fo’i le fa’aSatani i faiga palota i motu o le Pasefika. Ia ta te matamuli e tusitusi lo ta lima leaga o le Pasefika e kerisiano. E le taitai ona talia ni tupe e fesoasoani i ana faiga-palota. O uiga ia mai fafo i atunu’u e iloa su’e auala e fa’atele ai ana ‘oa ma ‘oloa.

Samoa e, o lau fa’a kerisiano lava o le a maua ai se tatou Itu Agai mo le isi lima tausaga.O la’u tatalo, ia alofa Le Atua is fa’atamao’aigaina e o le a palota mo sou finagalo autasi mo si o matou atunu’u o Samoa. Soifua.