Aisea tatou te iloa ai le mea ua sese a e le fa'asa'o?

A o sauni atu Samoa mo faiga palota i le Aso 4 o Mati 2011, ua manino lava ua toe fai fo'i le fa'atauina o palota i tua i nu'u ma alalafaga ma itumalo palota. Ua manino fo'i le fa'aauau pea o faiga taufa'afefe i aiga ina ia palota i se sui mai le itu a le HRPP po o le malo a Tuila'epa. Afai e palota 'ese o le a fa'asala pe tutuli 'ese fo'i ma le nu'u.
O fea la o iai le aia aloaia a le tagata e fai ai lana filifiliga e pei ona tusia i le Fa'avae o le Malo o Samoa. O fea o iai le tofa mamao ma le fa'autautaga loloto i le fa'aMatai ina ia tausisi ai i mea tonu ma mea sasa'o? O le a le mea ua tala pelo ma fa'a'ole'ole ai le atunu'u fa'apea a e le tu'u le sa'olotoga i le tagata.
Ou te manatu e le kerisiano ma le temokarasi faiga palota e fa'aaoga ai le malosi'aga o pulega fa'amatai lagolagoina e le Malo e pu'e mai ai palota a tagata o le atunu'u.
Talofa e ia Samoa. Talofa e i tupulaga fai mai ma e le i fananau mai o le a tula'i mai se Samoa e pulea mai fafo e latou o u'uina tupe ma le tamao'aiga o le lalolagi po o e fo'o e popoto e fai togafiti e maunu mai ai fanua o si o matou atunu'u e maua ai lo latou tamaoaiga.

Le Ali'i e, o Oe lava o lo matou Atua. Na e faia le lagi ma le lalolagi. Ua matou fa'ato'ese atu ona o matou loto ua tumu i le fefete ma le fa'amaualuga. Ua matou fia Atua fo'i a e galo lou alofa na ala mai i Lou Alo pele o Iesu. Liligi mai lou Agaga i lou atunu'u o Samoa ina ia toe fuata'ina o matou loto ina ia iloa 'Oe ma lou alofa ua matou ola ai. Fesoasoani i so'o se auala i faiga palota ia Mati ina ia maua se fuainumera e fa'akersianoina ai ma fa'atemokarasiina ai so matou Malo Fou mo Samoa. I lou suafa Iesu ua tatalo atu ai - AMENE.