Sina Faamatalaga i a Vavae Toma

Aso na fanau ai - 24.04.1915
Nu'u na fanau ai - Safotu i Savai'i
Igoa o le Tama - Toma Polutea Maiava Laausauga
Igoa o le Tina - Fo'ilagi Ainu'u Pani
Igoa o Uso - Tauinaola (mai le usuga muamua a Toma ia Ataga'i),Ainu'u Kapoka, Polutea Kapeteni, Laausauga, Muaausa Uatisone, Maiava Iulai(Na fanaua Iulai e Safotu ae sa tausia e Toma ma Fo'i. Na mama'i loa Toma ma Fo'ilagi ona fa'aauau lea o le galuega fa'amatua e Vavae ma Avai'a)
Igoa o Tuafafine - Safotu, Olive, ma Perise
Nu'u o le Tama - Sato'alepai ma Fagamalo
Nu'u o le Tina - Sapapali'i ma Safa'ato'a

Na avea Toma ma Fo'ilagi ma faife'au i le nu'u o Safotu. O iina na fanau ai Vavae. Na tu'ua le galuega i Safotu ina ua tauaso Toma, ona fa'amalolo ai lea i le aiga i Sato'alepai, pe fa'ato'a lima (5) tausaga o Vavae. O iina na ola ai Vavae i ni tausaga se tele i le tausiga o matua a e maise le fai o ia ma lima ma mata o lona Tama tauaso, ma le tina, ua pei o ia o le Tama o le aiga.
Na a'oga i le a'oga faife'au a Tupe ma Fale, Tulagalua i Tutaga, A'oga i Vaipouli, A'oga nofotumau i Malifa, A'oga Maualuga i Avele maua ai le tusi pasi pito i maualuga i na ona po, o le Proficiency Certificate. Na faia'oga i le Tulagalua i Saipipi, A'oga Fa'amasani a Matapo'o i Samauga, A'oga i Leulumoega Fou. Ulufale i le kolisi i Malua i le 1938 seia o'o i le 1942. Na fa'aipoipo ma Avai'a i le 1942.